ԵՐԵՎԱՆ, 31 հոկտեմբերի — Sputnik. Ե՞րբ կկառուցվի տարիներ առաջ խոստացված Հայաստան-Իրան երկաթուղին, և արդյո՞ք կառավարության առաջիկա 5 տարվա ծրագրում այն ներառված է: Այսօր ԱԺ-ում ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանին նման հարց ուղղեց ԱԺ «Ելք» խմբակցության պատգամավոր Արամ Սարգսյանը:
«ՀՀ-ն պայմանագիր ունի ստորագրած մի ընկերության հետ, որը պարտավորություն է ստանձնել ներդրումային ծրագիր ներկայացնել Հայաստան-Իրան երկաթգիծը կառուցելու համար: Քննարկումներն այդ ընկերության հետ շարունակվում են, արդյունքների մասին տեղյակ կպահենք»,- ասաց նախարարը՝ չհստակեցնելով ո՛չ պայմանավորվածությունների ներկա մակարդակը, ո՛չ էլ ծրագրի իրականացման ժամկետները:
Հայաստան-Իրան երկաթուղու կառուցման ծրագրի մասին առաջին անգամ հայտարարվեց 2008թ-ին:
Ծրագրի բյուջեն գնահատվեց նախ 2,2 միլիարդ դոլար, ապա՝ 2017-ին այն վերահաշվարկվեց 3.2 միլիարդ դոլար:
2013 թ․-ին հայտարարվեց, որ ծրագրի կոնցեսիոն կառավարիչն է «Ռասիա ՖԶԷ» ընկերությունը, որը պարտավորվել է ոչ միայն կազմակերպել շինարարությունը, այլև ներդրումներ հայթայթել:
Իսկ ինչ վերաբերում է հայաստանյան երկաթուղին շահագործող «Հարավկովկասյան երկաթուղիներ» ընկերությանը, Վահան Մարտիրոսյանը շեշտեց, որ այդ ընկերությունը ներդրումային ծրագրերն իրականացնում է 103%-ով:
