ԵՐԵՎԱՆ, 17 մայիսի — Sputnik. Հայ և ադրբեջանցի քաղաքագետները մայիսի 17-ին հեռակապի միջոցով միասին քննարկեցին երկու երկրների նախագահների` նախօրեին տեղի ունեցած հանդիպման հնարավոր արդյունքները և կարծիք հայտնեցին ԼՂ խնդրի խաղաղ կարգավորման հնարավորության մասին։
Ադրբեջանցի քաղաքական մեկնաբան, IWPR-ի թղթակից Շահին Ռզաևը հույս հայտնեց, որ Սարգսյան-Ալիև հանդիպումն առաջընթաց է կարգավորման գործընթացում։
Իսկ «Գլոբալիզացիայի և տարածաշրջանային համագործակցության վերլուծական կենտրոնի» խորհրդի նախագահ Ստեփան Գրիգորյանի համոզմամբ` բանակցային գործընթացում որևէ առաջընթացի համար առաջին հերթին պետք է լուծել դիպուկահարներին շփման գծից հեռացնելու հարցը։
«Եթե պետք է բանակցություներն ընթանան ու զուգահեռ մարդիկ սպանվեն, ես չեմ պատկերացնում, թե դա ինչպես կարող է լինել։ Այ, ասում ենք` գիշերը բանակցություններ են ընթացել։ Մենք ասում ենք շատ լավ է, որ բանակցել են, բայց գիշերը սպանել են մեր զինվորին»,- ասաց քաղաքագետը։
Ադրբեջանցի քաղաքական մեկնաբան Նիջաթ Ռզաևն էլ հիշեցրեց Մաքիավելիի խոսքերը. «Քաղաքական գործիչը պետք է համադրի իր մեջ աղվեսի և առյուծի հատկանիշները» և հավելեց «Այն գործիչը, ով կկարողանա համատեղել այս հատկանիշները և առավել մեծ քաղաքական կամք դրսևորել, նրա հետևից էլ կգնա ժողովուրդը, և նրա օգտին էլ կլուծվի խնդիրը։ Իսկ անվերջ բանակցությունների փուլն, ինչպես ասում են, մենք արդեն անցել ենք»։
Քաղաքացիական հասարակության ներկայացուցիչների այսօրվա հեռակա հանդիպման փորձով Ստեփան Գրիգորյանն իր ադրբեջանցի գործընկերներին առաջարկեց միավորել ջանքերը` ԼՂ խնդրի խաղաղ կարգավորման գործընթացում։
«Իհարկե, բացի մեր ու մեր երկրների ղեկավարների ցանկությունից` կարգավորման գործընթացի վրա ազդում են նաև շատ ու շատ այլ, այդ թվում`արտաքին գործոններ։ Բայց մեր դերը պետք է կայանա միմյանց որոշակի դրական ազդակները, եթե դրանք, իհարկե, կան, օրինակ` համատեղ հայտարարություն անել կամ մեկ այլ բան։ Դա կարող էր կես տոկոսով բարելավել վիճակը»,- ասաց Ստեփան Գրիգորյանը։
Նրա առաջարկին, սակայն, ադրբեջանցի գործընկերները որևէ կերպ չարձագանքեցին։
