Գագիկ Ծառուկյանին պատկանող ձիերին ևս փորձում են առգրավել. ԶԼՄ
21:24 13.07.2026 (Թարմացված է: 21:25 13.07.2026)
© Sputnik / Asatur Yesayants
Բաժանորդագրվել
Փաստաբանի համար անհասկանալի է, թե ինչ հիմքով են տանելու ձիերին, որոնք ոչ թե վայրի, այլ ընտանի կենդանիներ են։
ԵՐԵՎԱՆ, 13 հուլիսի – Sputnik․ «Բարգավաճ Հայաստան» կուսակցության առաջնորդ Գագիկ Ծառուկյանին պատկանող ձիերին և փասիաներին ևս փորձում են առգրավել։ Այս մասին հայտնում է «Փաստինֆոն»՝ հղում անելով Ծառուկյանի փաստաբան Էմին Խաչատրյանին։
«Օրեր առաջ եկել էին և ցանկանում էին նման գործողություններ իրականացնել։ Բնականաբար, մեր գործընկեր փաստաբաններն առարկել են այդ գործողության դեմ՝ հաշվի առնելով, որ ձիերը ընտանի կենդանիներ են, և որևէ մեկը խնդիր չունի իր անձնական տարածքում ձիեր պահելու, հատկապես, որ դրա համար առկա են բոլոր անհրաժեշտ և բավարար պայմանները։ Այդ օրը քննիչն արձանագրել է առգրավման անհնարինություն, բայց, այնուամենայնիվ, մենք որոշակի տեղեկություններ ու մտավախություններ ունենք, որ կարող է այդ գործողությունը կրկնվել»,- ասել է Խաչատրյանը։
Նրա խոսքով՝ անհասկանալի է, թե ինչպես են փորձելու դա անել, բայց կարծում է՝ հերթը նաև փասիաններին է հասնելու, որոնք վայրի կենդանիների հետ կապ չունեն։
Aravot.am-ը ևս գրում է, որ «Մուլտի Գրուպ»-ին պատկանող ձիասպորտի ակումբին տեղեկություններ են հասել, թե առաջիկայում ակումբի 12 ձիերը նույնպես կարժանանան ԲՀԿ առաջնորդ Գագիկ Ծառուկյանի մյուս կենդանիների ճակատագրին՝ կառգրավվեն ու կհանձնվեն պետությանը:
«Լուրերը վաղուց էին պտտվում, որ կարող են տանել։ Սկզբում հիմքեր չունեին, քանի որ ընտանի կենդանիներ են համարվում, և ով ուզում է, կարող է պահել, իսկ պայմաններն այստեղ լավն են։ Փորձում էին պայմաններից կառչել, ասել, թե պայմանները վատն են և այլն։ Դրան զուգահեռ ունենք բոլոր ապացույցները, բժիշկների եզրակացությունները, որ ձիերը շատ լավ պայմաններում են ապրում։ Ձիերը չեն շահագործվում, միայն նրանց խնամակալներն են վարում ու խնամում»,- լրատվամիջոցի հետ զրույցում ասել է ձիերից մեկի խնամակալ Մարիամ Սարգսյանը։
Նրանց տեղեկություններով՝ ձիերի հետևից վաղն են գալու։
Հիշեցնենք` հուլիսի 6-ի առավոտյան դիմակավորված հատուկջոկատայինները ներխուժեցին Ծառուկյանի առանձնատուն: Ավելի ուշ հայտնի դարձավ, որ քննչական գործողություններ են իրականացվում նաև Ծառուկյանին պատկանող տարբեր օբյեկտներում, ինչպես նաև «Մուլտի գրուպ» կոնցեռնի կազմում ընդգրկված ընկերությունների տնօրենների բնակարաններում։ Ավելի քան 20 ընկերություն կապարակնքվեց և մինչ օրս չի գործում։
Գագիկ Ծառուկյանին ձերբակալեցին, ապա կալանավորեցին 2 ամսով։ Գործարարը և ևս մեկ անձ մեղադրվում են խարդախության օժանդակության և փողերի լվացման օժանդակության մեջ։ Եվս մեկ գործ էլ հարուցվել է վայրի կենդանի կամ թռչուն ապօրինի որսալու դեպքի առթիվ:
