Օրակարգում նման հարց չունենք. պատգամավորը` «Ուժեղ Հայաստանի» բոյկոտի մասին
19:08 13.11.2026 (Թարմացված է: 19:09 13.11.2026)
Տիգրան Աբրահամյանը. Արխիվային լուսանկար
© Sputnik / Aram Nersesyan
Բաժանորդագրվել
Տիգրան Աբրահամյանը նշեց, որ ընդդիմության ինստիտուցիոնալ պայքարը շարունակվում է։
ԵՐԵՎԱՆ, 13 նոյեմբերի – Sputnik. ԱԺ «Ուժեղ Հայաստան» խմբակցությունում չեն քննարկում խորհրդարանում աշխատանքները բոյկոտելու հարցը։ Այս մասին Sputnik Արմենիայի հետ զրույցում ասաց ԱԺ «Ուժեղ Հայաստան» խմբակցության քարտուղար Տիգրան Աբրահամյանը։
«Օրակարգում նման հարց չունենք: Մեր ինստիտուցիոնալ պայքարը շարունակվում է: Վերջին շաբաթների ընթացքում ազգային օրակարգի շուրջ ունեցած հանդիպման արդյունքներով ընթանում են քննարկումներ»,– նշեց պատգամավորը։
Նշենք, որ այսօր «Ժողովուրդ» օրաթերթը գրել էր, թե «Ուժեղ Հայաստան» խմբակցությունում ներքին թեժ քննարկումներ են ընթանում՝ կապված Ազգային ժողովում հետագա գործունեության հետ։
Հիշեցնենք` նոյեմբերի 4–ին վաղ առավոտից ՀՀ քննչական կոմիտեի ծառայողները սկսեցին խուզարկություն իրականացնել «Ուժեղ Հայաստան» կուսակցության առաջնորդ Սամվել Կարապետյանի, ԱԺ նույնանուն խմբակցության ղեկավար Նարեկ Կարապետյանի տներում։ ՔԿ-ն ավելի ուշ հաղորդագրություն տարածեց՝ նշելով, որ կոմիտեի տնտեսական հանցագործությունների և մաքսանենգությունների քննության գլխավոր վարչությունում քննվող քրեական վարույթի շրջանակում65 հասցեներում իրականացվում են միաժամանակյա խուզարկություններ։
Շուրջ 7 ժամ տևած խուզարկությունից հետո ԱԱԾ աշխատակիցները Սամվել Կարապետյանին տեղափոխեցին Քննչական կոմիտե։ Նա ձերբակալվեց։ Ըստ հաղորդագրության՝ փաստական տվյալներ են ձեռք բերվել այն մասին, որ Սամվել Կարապետյանի կազմակերպմամբ մի շարք անձինք 2016-2024 թվականների ընթացքում մասնավոր ոլորտում կատարել են 4 դրվագ ծառայողական լիազորությունների չարաշահում, առանձնապես խոշոր չափերով վստահված գույքի հափշտակություն և առանձնապես խոշոր չափերով փողերի լվացում:
Նոյեմբերի 5–ին դատարանը որոշեց 1 ամսով կալանավորել «Ուժեղ Հայաստանի» առաջնորդին։
