Եթե Սամվել Կարապետյանին ազատ չարձակեն, շաբաթվա ավարտին կլինի մեծ հանրահավաք. Ալեքսանյան
20:16 13.10.2025 (Թարմացված է: 20:21 13.10.2025)
© Sputnik
Բաժանորդագրվել
Օգոստոսի 15–ին ՀՀ հակակոռուպցիոն դատարանը 2 ամսով երկարացրել էր Սամվել Կարապետյանի կալանքի ժամկետը։
ԵՐԵՎԱՆ, 13 հոկտեմբերի – Sputnik․ Գործարար, բարերար Սամվել Կարապետյանի գործով հաջորդ դատական նիստը տեղի կունենա հոկտեմբերի 14–ին, ժամը 18:00–ին։ Այս մասին տեսաուղերձով տեղեկացրել է «Մեր ձևով» շարժման համակարգող խորհրդի անդամ Ալիկ Ալեքսանյանը։
«Եթե Սամվել Կարապետյանին ազատ չարձակեն, շաբաթվա ավարտին կունենանք մեծ հանրահավաք Ազատության հրապարակում»,– հայտարարեց նա։
Հիշեցնենք` հունիսի 17-ին Սամվել Կարապետյանի տանը խուզարկություն իրականացվեց այն բանից հետո, երբ հրապարակավ աջակցություն հայտնեց Հայ առաքելական եկեղեցուն՝ ընդգծելով, որ մի փոքրիկ խմբակ, մոռանալով հայոց պատմությունը, հայ եկեղեցու հազարավոր տարիների պատմությունը, հարձակվել է հայ եկեղեցու վրա, հայ ժողովրդի վրա: Կարապետյանը 2 ամսով կալանավորվեց հունիսի 18-ին։ Օգոստոսի 15–ին Հակակոռուպցիոն դատարանի դատավոր Տիգրան Դավթյանը 2 ամսով երկարացրեց Սամվել Կարապետյանի կալանքի ժամկետը։
Ինչպես հայտնի է, գործարարին երկու մեղադրանք էր առաջադրվել՝ իշխանությունը զավթելու հրապարակային կոչ և փողերի լվացում: Հոկտեմբերի 13–ին Կարապետյանին առաջադրվեց տնտեսական բնույթի ևս մեկ մեղադրանք։
