Երկարաձգվեց «Սրբազան պայքարի» ևս 2 համակիրների կալանքի ժամկետը
21:27 22.08.2025 (Թարմացված է: 21:30 22.08.2025)
Առաջին ատյանի դատարանի դատավոր Կարեն Ֆարխոյանը
© Sputnik
Բաժանորդագրվել
Դատավոր Կարեն Ֆարխոյանը բավարարեց մեղադրողի ներկայացրած միջնորդությունները։
ԵՐԵՎԱՆ, 22 օգոստոսի – Sputnik․ Դատարանի որոշմամբ 3 ամիս ժամկետով երկարաձգվեց «Սրբազանի պայքարի» գործով անցնող բլոգեր Արմեն Ալեքսանյանի և Հայկ Շահնազարյանի կալանքի ժամկետը։
Նման որոշում կայացրեց այսօր Առաջին ատյանի դատարանի դատավոր Կարեն Ֆարխոյանը՝ բավարարելով հանրային մեղադրողի ներկայացրած միջնորդությունները։
Հրայր սարկավագ Հակոբյանի խափանման միջոցի հարցը կքննարկվի սեպտեմբերի 10-ին՝ 16։00-ին։
Հիշեցնենք` օգոստոսի 20-ին դատարանի որոշմամբ 3-ամսով երկարաձգվեց Լիդյա Մանթաշյանի կալանքի ժամկետը, հաջորդ օրը` Բագրատ սրբազանի, Վահագն Չախալյանի, Արթուր Սարգսյանի, Արման Իսրայելյանի և Արսեն Ղազարյանի կալանքի ժամկետը։
44-օրյա պատերազմում զոհված ազատամարտիկ Հակոբ Ռոստոմյանի հոր՝ Արա Ռոստոմյանի խափանման միջոց կալանքը փոխարինվեց տնային կալանքով՝ համակցված բացակայելու արգելքով։ Նրան թույլատրվեց նաև շաբաթական առնվազն 2 անգամ Պրոբացիայի ծառայության կամ ոստիկանության ուղեկցությամբ այցելել «Եռաբլուր» զինվորական պանթեոն։ Այսօր դատարանը որոշեց 3 ամսով երկարաձգել նաև գործարար Տիգրան Գալստյանի, պատգամավոր Արթուր Սարգսյանի վարորդի՝ Կարո Օկումուշյանի, ակտիվիստներ Մովսես Շարբաթյանի և Տիգրան Թոփալյանի, Արցախի Հանրապետության Ազգային ժողովի պատգամավոր, «Արդարություն» խմբակցության ղեկավար Դավիթ Գալստյանի կալանքի ժամկետը։ «Սրբազան պայքարի» գործով անցնող ՀՅԴ ԳՄ անդամ Իգոր Սարգսյանի կալանքի ժամկետը 3 ամսով երկարաձգվեց։ Առողջական լուրջ խնդիրներ ունեցող Աղվան Արշակյանը կշարունակի մնալ տնային կալանքի տակ։
Ըստ ՀՀ քննչական կոմիտեի` «Սրբազան պայքար» շարժման մասնակիցները և ղեկավարները պլանավորել էին ՀՀ-ում իրականացնել ահաբեկչական և իշխանությունը զավթելուն ուղղված գործողություններ։
