Ո՞ր դեսպանատունն է հունիսի 12-ի մասին խայտառակ պատասխան տվել Բագրատ սրբազանին. «Հրապարակ»
10:43 04.07.2024 (Թարմացված է: 15:28 04.07.2024)
© Sputnik
Բաժանորդագրվել
Բագրատ սրբազանը սյունեցիների հետ հանդիպման ժամանակ ընդգծել է, որ տվյալ երկիրը Եվրոպայում խոշոր խաղացող է։
ԵՐԵՎԱՆ, 4 հուլիսի – Sputnik. «Տավուշը հանուն հայրենիքի» շարժման առաջնորդ Բագրատ սրբազանը Սյունիք կատարած այցի ընթացքում գորիսեցիներին հայտնել է, որ ՀՀ–ում հավատարմագրված եվրոպական երկրներից մեկի դեսպանատունը խայտառակ պատասխան է տվել հունիսի 12-ի դեպքերի առնչությամբ։ Այս մասին գրում է «Հրապարակ» օրաթերթը։
Հունիսի 12-ին ԱԺ–ի շենքի մոտ բախումներ սկսվեցին ոստիկանների և «Տավուշը հանուն հայրենիքի» շարժման անդամների ու կողմնակիցների միջև։ Ոստիկանությունը լուսաձայնային նռնակներ կիրառեց, ինչի հետևանքով 101 անձ վնասվածք ստացավ, այդ թվում` ոստիկաններ։
«Այդ դեսպանատուն մեր հայրենակիցները նամակ են ուղարկել, խոշոր էլ երկիր է, Եվրոպայի մեծ խաղացողներից, նամակի հետ տեսանյութերով փոխանցվել են ոստիկանական վայրագությունները, որ 30 հոգով մարդ են ծեծում, կանանց, երեխաների վրա ռումբ են (խոսքը լուսաձայնային նռնակի մասին է, – խմբ.) նետում, ծեծում-ջարդում են։ Ի՞նչ են պատասխանում․ ասում են՝ այո, այս դրվագները սարսափելի են, սրանք ուղղակի անընդունելի են, բայց ավելի պակաս սարսափելի են, քան այն, որ ռուսամետները պիտի գան իշխանության, ավելի ճիշտ՝ ռուսական գործակալները»,– սյունեցիների հետ զրույցում ասել է սրբազանը։
Նա չի հանրայնացրել տվյալ երկրի անունը՝ ասելով, որ նման իրավասություն չունի, սակայն, պարբերականի տեղեկություններով, խոսքը Հայաստանում Ֆրանսիայի դեսպան Օլիվիե Դըկոտինյիի մասին է։
Թերթը գրում է նաև, որ սրբազանը բնակիչներին կոչ է արել հույսը սեփական անձի վրա դնել։
Հիշեցնենք, որ նախորդ շաբաթ սրբազանը 3-օրյա այցով Սյունիքի մարզում էր ու շրջել է տարբեր քաղաքներում և գյուղերում, զրուցել բնակիչների հետ, ծանոթացել նրանց անհանգստացնող հարցերին։
