Հայհոյել են, կիրառվել է արցունքաբեր գազ. պարեկների և 3 քաղաքացու միջև կրկին վեճ է եղել
13:53 27.03.2023 (Թարմացված է: 14:07 27.03.2023)
© Sputnik / Andranik GhazaryanՊարեկները Երևանում
![Պարեկները Երևանում Պարեկները Երևանում - Sputnik Արմենիա, 1920, 27.03.2023](https://cdn.am.sputniknews.ru/img/07e6/08/19/47287651_0:113:1600:1013_1920x0_80_0_0_d5b80ae6b9049c9fe930db4c96dcebd2.jpg)
Պարեկները Երևանում. Արխիվային լուսանկար
© Sputnik / Andranik Ghazaryan
Բաժանորդագրվել
Գեղարքունիքի մարզում 3 տղամարդ վիճաբանել են պարեկային ծառայողների հետ, ինչի արդյունքում 2-ը կալանավորվել են, 1-ը դիմել է փախուստի։
ԵՐԵՎԱՆ, 27 մարտի – Sputnik. Գեղարքունիքի մարզում պարեկները և 3 քաղաքացի վիճաբանել են, հնչել են հայհոյանքներ, կիրառվել է արցունքաբեր գազ և ֆիզիկական ուժ։ Տեղեկությունը հայտնում է ՀՀ քննչական կոմիտեի մամուլի ծառայությունը։
Նշվում է, որ քաղաքացիները փորձել են միջամտել ոստիկանների օրինական ծառայողական գործունեությանը։
«Ավագ պարեկը զեկուցագիր է ներկայացրել, համաձայն որի Ծովակ գյուղից մինչև Կարճաղբյուր գյուղ ընկած ճանապարհահատվածում ծառայություն իրականացնող պարեկները երեկոյան ժամի նկատել են կայանված «Վազ 2114» մակնիշի ավտոմեքենա: Ելնելով կայանված դիրքից՝ վերջիններս, կարծելով թե օգնության կարիք կա, մոտեցել են նշված ավտոմեքենային, որից իջել է 3 անձ: Նրանցից մեկը՝ Գեղարքունիքի մարզի 29-ամյա բնակիչը, սկսել է հայհոյել պարեկային ծառայողներին, որից հետո վերջիններիս են մոտեցել նաև նույն մարզի 30 և 31-ամյա բնակիչները և նույնպես սկսել են հայհոյել»,– ասված է հաղորդագրությունում:
Այդ ընթացքում 31-ամյա տղամարդը քաշքշել ու հարվածել է պարեկներին, ինչպես նաև պոկել նրանցից մեկին ամրակցված տեսախցիկը և փորձել պոկել մյուս ծառայակիցների տեսախցիկները։ 29-ամյա տղամարդն էլ ոտքով հարվածել է պարեկային ծառայության ավտոմեքենայի աջ հատվածին՝ վնասելով այն: Նշված գործողությունների ընթացքում պատռվել է պարեկներից մեկի հագին եղած ծառայողական լուսարձակող բաճկոնը:
Պարեկները 3 տղամարդու նկատմամբ կիրառել են արցունքաբեր գազ, ֆիզիկական ուժ։ 30 և 31-ամյա տղամարդիկ հանցանք կատարելու մեջ հիմնավոր կասկածանքի հիմքով ձերբակալվել են, իսկ 29-ամյա տղամարդը, ում ձեռքին եղել է մահակ, դիմել է փախուստի:
Դեպքի առթիվ նախաձեռնվել է քրեական վարույթ, որի շրջանակներում հիշյալ պարեկները տուժող են ճանաչվել և հարցաքննվել։ Նշանակվել են դատաբժշկական փորձաքննություններ:
Միջնորդություն է ներկայացվել հսկող դատախազին՝ նշված 2 անձի նկատմամբ ՀՀ քրեական օրենսգրքի 452-րդ հոդվածի (Պաշտոնատար անձի օրինական ծառայողական կամ քաղաքական գործունեությանը միջամտելը) 3-րդ մասով նախատեսված հանցավոր արարք կատարելու համար հանրային քրեական հետապնդում հարուցելու վերաբերյալ, որը բավարարվել է և նրանց ներկայացվել է մեղադրանք։
Վարույթն իրականացնող մարմինը միջնորդություններ է ներկայացրել դատարան՝ նրանց նկատմամբ որպես խափանման միջոց կալանավորումն ընտրելու վերաբերյալ, որոնք ևս բավարարվել են։
Ձեռնարկվում են անհրաժեշտ միջոցառումներ՝ դեպքի բոլոր հանգամանքները պարզելու, 29-ամյա տղամարդուն հայտնաբերելու, վարույթն իրականացնող մարմին ներկայացնելու, ինչպես նաև նրա նկատմամբ հանրային քրեական հետապնդում հարուցելու հարցը լուծելու ուղղությամբ:
Հիշեցնենք, որ նմանատիպ դեպք վերջին անգամ եղել է մարտի 15-ին և կրկին Գեղարքունիքի մարզում, սակայն այս անգամ Արծվանիստ գյուղում։ Պարեկները փորձել են իրենց հայհոյող անձին ենթարկել վարչական ձերբակալման, ինչին միջամտել են նրա հայրն ու գյուղի ևս 3 բնակիչ։ Նրանք քաշքշել և ձեռքերով և բռունցքներով հարվածներ են հասցվել ոստիկանության աշխատակիցներին։
Վիճաբանությանը մասնակցած 5 անձ ձերբակալվել է անմիջականորեն ծագած հիմնավոր կասկածի հիմքով։