ԵՐԵՎԱՆ, 13 հունիսի – Sputnik․ Բաքվի բանտերում հայ գերիների նկատմամբ վերաբերմունքն անմարդկային է, նրանք դժոխքի միջով են անցել։ Գեղարքունիքում «Պատիվ ունեմ» դաշինքի քարոզարշավի ժամանակ նշեց ՀՀ երրորդ նախագահ Սերժ Սարգսյանը՝ անդրադառնալով 15 գերիների հայրենիք վերադարձին։ Նա մաղթեց, որ տղաներն արագ վերականգնվեն ու կազդուրվեն։
«Մենք նույնիսկ չգիտենք, թե քանի գերի ունենք և գերության մեջ քանի հայ զինվոր ու սպա են սպանվել, իսկ որ այդպիսի դեպքեր կան, դա միանշանակ է»,-ասաց նա:
Սերժ Սարգսյանի խոսքով՝ այս իշխանությունների ամենամեծ թերություններից մեկն էլ այն է, որ գերիներին վերաբերող ամբողջ տեղեկատվությունը նրանք փակ են պահում: Նա նշեց՝ ինչ իմացել են, իրավապաշտպան կառույցների աշխատանքի արդյունք է:
«Բանից պարզվում է, որ մենք ունենք Ադրբեջանի կողմից պաշտոնապես ճանաչված 60 հայ գերի, մենք ունենք տեսագրություններ՝ 30 հոգու, ունենք ինդետիֆիկացված ևս 47 մարդ: Այսինքն՝ մենք չգիտենք՝ քանի գերի ունենք: Այս իշխանությունների առաջին խնդիրը դա պետք է լիներ և ութ ամիս է՝ ի՞նչ են արել: Ուզում եմ բոլոր քաղաքական ուժերին կոչ անել, որ չշահարկեն այդ մարդկանց անունները։ Նրանք դժոխքի միջով են անցել և այս նախընտրական պրոցեսներին չպետք է մասնակցեն»,- նշեց ՀՀ երկրորդ նախագահը։
Նա նաև անդրադարձավ 15 հայ գերիների վերադարձի դիմաց Ադրբեջանին փոխանցված ականապատ տարածքների քարտեզներին։
«30 տարի այդ տարածքներն ականապատվել են։ Պատկերացնո՞ւմ եք՝ այդ քարտեզները իրենցից ինչ արժեք են ներկայացնում։ Սա մի քանի հարց է առաջացնում, ինչու՞ 15 հոգի»,- հայտարարեց Սերժ Սարգսյանը։
Նրա կարծիքով՝ այդ քարտեզները շատ ավելի մեծ հնարավորություն էին տալիս, քան միայն 15 հայ զինվորների վերադարձն էր։ Նշում է՝ դրա պատճառն այն է, որ այս իշխանություններն ի վիճակի չեն բանակցել։
Հետո էլ մեկ ուրիշ հարց է բարձրացնում․ «Բա եթե հնարավոր էր քարտեզների դիմաց գերիներ վերադարձնել, ինչու՞ այս 8 ամսում չեն արել, պահել են, որ նախընտրական շոու՞ անեն, այսինքն՝ Ալիևի հետ պաս տալով խաղու՞մ են»,-ասաց նա։
ՀՀ երկրորդ նախագահի խոսքով՝ հիմա Ադրբեջանում քեֆ-ուրախություն է, որովհետև վերջապես ստացել են այդ քարտեզները։ Պնդում է՝ ցանկացած դեպքում չէր կարելի քարտեզներն Ադրբեջանին հանձնել հունիսի 12-ին։
Նշում է՝ Քարվաճառը մենք առանց կրակոցի տվեցինք Ադրբեջանին Մոնթեի ծննդյան օրը, այս անգամ էլ Մոնթեի մահվան օրը՝ հունիսի 12-ին, հանձնեցինք այդ քարտեզները։ Ընդգծում է՝ նաև այն հատվածի քարտեզը, որտեղ հենց Մոնթեն էր զոհվել։
Հիշեցնենք` հունիսի 12-ին հայտնի դարձավ, որ Բաքուն Ակնայի (Աղդամ) ականապատ տարածքների քարտեզի դիմաց Հայաստանին է փոխանցել 15 հայ ռազմագերի։ Այդ տեղեկությունը հաստատեց ՀՀ վարչապետի պաշտոնակատար Նիկոլ Փաշինյանը, ավելին` լուսանկար հրապարակեց, որում 15 տղաներն են, ապա նաև հայտնեց Հայաստան վերադարձածների անունները։
Հավելենք` ղարաբաղյան հակամարտության գոտում հրադադարի հաստատումից հետո Ադրբեջանում պահվող գերիների և պատանդների վերադարձի հարցը վերջնականապես չի լուծվում։ Ադրբեջանը չի շտապում վերադարձնել բոլոր գերիներին։
Գերիներին վերադարձնելու պայմանավորվածության հարցում վճռորոշ դեր է ունեցել Մուրադովը
Ավելին` 26 հայ ռազմագերիների ներկայացրել է որպես դիվերսանտներ և համապատասխան մեղադրանք առաջադրել։
Անցած ժամանակահատվածում փոխանակման ընդամենը մի քանի դեպք է եղել, և բացի այս, հայրենիք են վերադարձել 69 հայ զինվորականներ և քաղաքացիական անձինք: Ըստ իրավապաշտպանների` Ադրբեջանում ավելի քան 200 հայ գերի կա։
