ԵՐԵՎԱՆ, 13 հունիսի – Sputnik․ Ադրբեջանին հանձնվել են ականապատ տարածքների ոչ բոլոր քարտեզները, բայց տրվել է դրանց շոշափելի մասը։ Կոտայքի մարզի Եղվարդ քաղաքում ընտրողների հետ հանդիպման ժամանակ հայտարարեց վարչապետի պաշտոնակատար, «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանը։
«Երեկ այնպիսի տպավորություն էր, որ ընդդիմությունը կամ հաշվարկել էր, կամ երաշխիք էր ստացել, որ գերիները գոնե առաջիկայում չեն վերադառնալու և հիմա սուգ ու շիվան են դրել, թե բա մեր քարտեզները տվել են, մեր ունեցած-չունեցածը տվել են, բոլորին կարելի էր վերադարձնել։ Ականապատ տարածքների քարտեզներ վերադարձվել են Ադրբեջանին։ Այնպիսի տպավորություն են ուզում ստեղծել, թե մենք ինչքան ունենք, բոլորը վերադարձվել է Ադրբեջանին։ Ամենևին այդպես չէ, վերադարձվել է մի փոքր մասը, բայց չեմ կարող ասել՝ ոչ շոշափելի մասը․ շոշափելի մաս է վերադարձվել, բայց փոքր մասն է վերադարձվել»,- նշեց Փաշինյանը։
Նա անդրադարձավ նաև հարցադրումներին, թե ինչու են գերիները վերադարձել հենց հիմա՝ նախընտրական պայքարի այս թեժ օրերին։ Փաշինյանի խոսքով՝ դեռ նախորդ տարվա դեկտեմբերից որոշակի քանակով քարտեզներ ադրբեջանական կողմին փոխանցվել են։ Քարտեզների փոխանցումը, նրա խոսքով, դադարեցվեց այն բանից հետո, երբ ադրբեջանական կողմը դադարեցրեց գերիների վերադարձի գործընթացը։
Շեշտեց՝ դրանք այն ականապատ տարածքների քարտեզներն են, որոնք «մեր միջև չեն», այսինքն՝ հայկական և ադրբեջանական կողմերի միջև չեն, այլ «ցավոք հանգամանքների բերումով» գտնվում են Ադրբեջանի թիկունքում։ Նրա խոսքով՝ ոչ թե «քարտեզները փոխանակվել են գերիների հետ», այլ՝ «քայլի դիմաց արել ենք քայլ և էլի քայլի դիմաց պատրաստ ենք անել քայլ»։
Նա կրկին հիշեցրեց, որ գերիների վերադարձը տեղի է ունեցել վրացական կողմի աջակցությամբ, ինչպես նաև ԱՄՆ պետքարտուղարի Եվրոպայի և Եվրասիայի հարցերով օգնականի պաշտոնակատար Ֆիլիպ Ռիկերի այցից հետո, որը պատմել է ԱՄՆ պետքարտուղար Էնթոնի Բլինկենիկողմից` գերիների հարցում բեկում մտցնել հանձնարարության մասին:
Փաշինյանի խոսքով՝ Ռիկերը հարց է ուղղել՝ արդյոք հայկական կողմը պատրաստ է պատասխան քայլ անել գերիների վերադարձի քայլի դիմաց։ Հայկական կոմից նա դրական պատասխան է ստացել։
Հիշեցնենք` հունիսի 12-ին հայտնի դարձավ, որ Բաքուն Ակնայի (Աղդամ) ականապատ տարածքների քարտեզի դիմաց Հայաստանին է փոխանցել 15 հայ ռազմագերի։ Այդ տեղեկությունը հաստատեց ՀՀ վարչապետի պաշտոնակատար Նիկոլ Փաշինյանը, ավելին` լուսանկար հրապարակեց, որում 15 տղաներն են, ապա նաև հայտնեց Հայաստան վերադարձածների անունները։
Հավելենք` ղարաբաղյան հակամարտության գոտում հրադադարի հաստատումից հետո Ադրբեջանում պահվող գերիների և պատանդների վերադարձի հարցը վերջնականապես չի լուծվում։ Ադրբեջանը չի շտապում վերադարձնել բոլոր գերիներին։
Գերիներին վերադարձնելու պայմանավորվածության հարցում վճռորոշ դեր է ունեցել Մուրադովը
Ավելին` 26 հայ ռազմագերիների ներկայացրել է որպես դիվերսանտներ և համապատասխան մեղադրանք առաջադրել։
Անցած ժամանակահատվածում փոխանակման ընդամենը մի քանի դեպք է եղել, և բացի այս, հայրենիք են վերադարձել 69 հայ զինվորականներ և քաղաքացիական անձինք: Ըստ իրավապաշտպանների` Ադրբեջանում ավելի քան 200 հայ գերի կա։
