ԵՐԵՎԱՆ, 14 փետրվարի - Sputnik. Ես նման նախագիծ չէի ցանկանա նույնիսկ իմ թշնամուն, ուր է, թե ես ինձ համար այդպիսի անհեթեթություն խզբզեի: «Արմնյուզ» հեռուստաընկերության հետ հարցազրույցում ասել է ՀՀ երրորդ նախագահ Սերժ Սարգսյանը՝ անդրադառնալով լայնորեն շրջանառվող այն լուրերին, թե «Նիկոլ Փաշինյանը Սերժ Սարգսյանի պրոյեկտն է»։
«Ինձ կանգնեցրել էին ցուցվանգի առջև»,- նշել է նախագահը՝ անդրադառնալով իր հրաժարականին։
Խոսելով «թավշյա հեղափոխության» և այդ շրջանում տեղի ունեցած իրադարձությունների մասին՝ նախագահը շեշտել է, որ «այն, ինչ տեղի ունեցավ 2018-ի գարնանը, իր էությամբ հակաղարաբաղյան շարժում էր»։
ՀՀ երրորդ նախագահ Սերժ Սարգսյանը խոսել է նաև իր նախագահության օրոք բանակցային գործընթացի մասին։
«Մենք երբեք չենք բանակցել այն մասին, թե մենք ինչ ենք տալու, մենք մշտապես բանակցել ենք այն մասին, թե մենք ինչ ենք ստանալու»,- նշում է նախագահը։
Խոստովանում է, որ մի անգամ ԵԱՀԿ Մինսկի խմբի համանախագահ երկրներից մեկի ղեկավարի հետ հանդիպման ժամանակ վերջինս իրեն հարց է ուղղել այն մասին, թե արդյոք ցանկություն կա՞ լուծելու ղարաբաղյան խնդիրը, թե՞ ոչ։
Պետական կառավարման համակարգը շոկի մեջ է, ռեստարտի կարիք կա. Նիկոլ Փաշինյան
«Ասաց, Սերժ, կարո՞ղ ես ուղիղ ասել, թե ո՞րն է քո նպատակը Ղարաբաղի հարցում, ուզու՞մ ես արդյոք խնդիրը լուծվի, թե՞ ուզում ես, որ ստատուս քվոն պահպանվի։ Ես անկեղծորեն ասացի, որ ուզում եմ այս խնդիրը լուծվի, չեմ ուզում այս խնդիրը թողնել հաջորդ սերունդների ուսերին»,- պատմում է նախագահը։
Սերժ Սարգսյանը խոսել է նաև հրապարակված գաղտնի ձայնագրության մասին, որում Բելառուսի նախագահ Ալեքսանդր Լուկաշենկոն իրեն փոխանցում է Իլհամ Ալիևի առաջարկը՝ հինգ միլիարդ դոլարի դիմաց զիջել յոթ շրջաններն Ադրբեջանին։
Լուկաշենկոյի առաջարկին ի պատասխան՝ Սերժ Սարգսյանն էլ վեց միլիարդ դոլար է առաջարկում Ալիևին՝ Արցախը հանգիստ թողնելու համար։ Լրագրողի այն հարցին, թե եթե վեց միլիարդ հավելյալ դոլար կար, ապա ինչու այդ գումարը չծախսվեց սպառազինության ձեռքբերման համար, նախագահն ընդգծում է, որ իր պատասխանը նշանակում էր «մենք չենք կարող սակարկության հանել մեր հայրենիքը»։
«Եթե Ալիևի քայլերը կապիտուլյանտը համարում է կառուցողական, ապա նա պետք է բացատրի՝ այդ ո՞ր քայլերը՝ ռազմական գործողություններ սկսե՞լը, թե՞ ինչ-որ գաղտնի պայմանավորվածություններ են եղել, թե՞ ինչ-որ գաղտնի խոստումներ են տվել իրար»,- նշում է ՀՀ երրորդ նախագահը՝ անդրադառնալով Նիկոլ Փաշինյանի ու Ալիևի հարաբերություններին։
Նախագահի խոսքով՝ իշխանությունների գործողություններով իր համար պատերազմն արդեն կանխատեսելի էր։
«Երբ այս խելապակաս իշխանությունները հրաժարվեցին մեր ձեռքբերումներից և սկսեցին Ալիևից տեղեկանալ բանակցային պատմության մասին, արդեն ինձ համար հասկանալի էր, որ մենք գնում ենք դեպի պարտություն, որ մենք գնում ենք դեպի պատերազմ»,- ընդգծում է նա։
Նշենք, որ հարցազրույցն ամբողջությամբ հեռուստաընկերության եթերում կլինի վաղը՝ 21:00-ին։
