ԵՐԵՎԱՆ, 2 դեկտեմբերի – Sputnik. ՀՀ երկրորդ նախագահ Ռոբերտ Քոչարյանի գրասենյակից հայտնում են, որ ԱԱԾ ֆունկցիաները և կարողություններն անհրաժեշտ են մեկ այլ՝ դավաճան-կապիտուլյանտների շարժառիթները պարզելու գործում Գրասենյակը նման հայտարարություն է տարածել` անդրադառնալով այսօր ԱԱԾ–ի տարածած հաղորդագրությանը։
ԱԱԾ–ն հաղորդագրություն էր տարածել` հայտնելով, որ նոյեմբերի 9-ի լույս 10-ի գիշերը զանգվածային անկարգություններին մասնակից անձանց մեջ մեծ թիվ են կազմել ՀՀ երկրորդ նախագահ Ռոբերտ Քոչարյանի կողմնակիցները, «ՀՅԴ» կուսակցության անդամ հանդիսացող անձինք, «Կամք» նախաձեռնության, «Այլընտրանք» ՀԿ անդամներն ու աջակիցները և այլք։
«Ինչպես հայտնի է, այսօր ՀՀ ԱԱԾ-ն, բառացիորեն արտատպելով վարչապետ Նիկոլ Փաշինյանի խոսնակի հին տեքստերից մեկը, մի հաղորդագրություն է տարածել։ Դրանով ազդարարել է կառավարության շենքի դիմաց բողոքի գործողությունների մասնակիցների մեջ Քոչարյանի կողմնակիցներին «հերոսաբար» հայտնաբերելու մասին։ Հարկ ենք համարում նշել, որ նման հայտնագործություն անելու համար պետք չէ ԱԱԾ լինել»,–նշված է հայտարարության մեջ։
«Ազգային անվտանգության» ղեկավար Գառնիկ Իսագուլյանի հայտարարություններով կզբաղվի ԱԱԾ–ն
ՀՀ երկրորդ նախագահի գրասենյակից տեղեկացնում են նաև, որ հանրահայտ փաստ է` Քոչարյանը հազարավոր կողմնակիցներ ունի, որոնք հայրենասեր, քաղաքականապես ակտիվ մարդիկ են և մշտապես մասնակցում են բողոքի տարբեր գործողությունների և հանրահավաքների։
