ԵՐԵՎԱՆ, 31 հունվարի - Sputnik. Հայտնի ռուս երգչուհի Յուլյա Նաչալովայի կյանքը հնարավոր կլիներ փրկել, եթե կատարվեր փտախտով (գանգրենա) ախտահարված ոտնաթաթի անդամահատում։ «Մոսկովսկի կոմսոմոլեց» թերթի հետ զրույցում Նաչալովայի բուժող բժիշկ Յուլի Շուրովը նշել է, որ երգչուհին մինչև վերջին պահը հրաժարվում էր վիրահատությունից։
Նաչալովան մահացել է 2019 թվականի մարտի 16-ին՝ 38 տարեկանում, բորբոքային գործընթացի պատճառով Յուլյայի սիրտը կանգ էր առել: Այսօր դերասանուհին կդառնար 40 տարեկան։
«Յուլյան հոդատապի (պոդագրա) պատճառով սովոր է ցավերի դիմանալ։ Այդպես նա դիմացել է, միչև ոսկրախտը «ներծծվել է» արյան մեջ։ Պարզապես պատահականությունների անհեթեթ շղթա է։ Քանի դեռ Յուլյան գիտակցություն ուներ, թույլ չէր տալիս անդամահատել ոտնաթաթը։ Իսկ երբ մասնագետներն, այնուամենայնիվ, վիրահատեցին, նա արդեն անգիտակից վիճակում էր, բայց ուշ էր. սկսվել էր արյան վարակումը», - պատմել է Շուրովը։
Նրա խոսքով ՝ ամեն ինչ սկսվել է ոտքի մատից, որը Յուլյան վնասել էր բարձրակրունկ կոշիկներ հագնելով. վերքը չէր բուժվել։
Բժիշկը նշում է՝ կարևորն այն էր, որ ժամանակին հեռացվեր նեկրոզի հատվածը։ Սակայն բժիշկները դրա համար պետք է ստանային Յուլյայի համաձայնությունը։ Մինչդեռ Նաչալովան հիվանդանոցում օրեր շարունակ դրան չէր համաձայնում՝ պնդելով, որ իրեն բուժեն։
«Նա մի աղջիկ էր, որը ցանկանում էր քայլել միայն բարձրակրունկներով»,- նշել է Շուրովը։
Նրա խոսքով՝ երբ ախտահարված էր միայն մատը, ավելի հեշտ կլիներ հարցը լուծելը։ Սակայն աստղը երկար ժամանակ բուժվում էր տանը, խորհրդակցում էր մասնավոր վիրաբույժի հետ։
Սկանդալ «Ձայնը» նախագծում. Ալսուի դուստրը երգել է մահացած Նաչալովայի երգը. տեսանյութ
Շուրովը նշել է, որ վերջին տարում Յուլյայի մոտ նաև շաքարախտ է զարգացել, սակայն նրա համար գլխավոր վտանգը հոդատապն էր: Խախտվել էր երիկամների աշխատանքը, կար միզաթթվի նյութափոխանակության խանգարում:
