ԵՐԵՎԱՆ, 21 մայիսի – Sputnik. ՀՀ Պետեկամուտների կոմիտեն անդրադարձել է Հայաստանից Վորոնեժ «մաքսանենգ» ծխախոտի արտահանման դեպքին: Տարածած հաղորդագրության մեջ ՊԵԿ-ը հայտարարում է, որ Երևանից մաքսանենգ ճանապարհով ծխախոտի արտահանման վերաբերյալ տեղեկատվությանը չի տիրապետում, և որ այդ դեպքով վարույթներ ՊԵԿ-ում չեն իրականացվում:
ՊԵԿ-ը նաև նշում է, որ 2014 թ.–ի մայիսի 29–ի` ԵԱՏՄ անդամ պետությունների պայմանագրով Մաքսային միության շրջանակում գործում է ապրանքների ներքին շուկա և իրականացվում է ապրանքների ազատ տեղափոխում անդամ պետությունների տարածքներով՝ առանց մաքսային հայտարարագրման ու պետական հսկողության:
Նույն պայմանագրով պետություններն իրավունք ունեն կիրառելու սահմանափակումներ միայն այն դեպքերում, եթե դրանք անհրաժեշտ են մարդու կյանքի և առողջության պահպանման, հասարակական բարոյականության և իրավակարգի պաշտպանության, շրջակա միջավայրի պահպանության, կենդանիների և բույսերի, մշակութային արժեքների պաշտպանության, միջազգային պարտավորությունների կատարման, երկրի պաշտպանության և անդամ պետության անվտանգության ապահովման համար:
Փաշինյանը հանձնարարել է «մաքրել» մաքսանենգ ծխախոտի հետքերը. Մինասյանի նոր տեսաուղերձը
Բացի այդ, ԵԱՏՄ անդամ պետությունների ապրանքները ենթակա չեն «մաքսային տարանցում» մաքսային ընթացակարգով ձևակերպման, եթե դրանք փոխադրվում են միության անդամ մի երկրից մյուս երկիր առանց միության անդամ չհանդիսացող պետության տարածքում օդանավի վայրէջք կատարելու:
«Սա նշանակում է, որ նման դեպքերում մաքսային մարմիններն իրավասու չեն այդ ապրանքների նկատմամբ որևէ գործառնություն (այդ թվում՝ մաքսային հսկողություն) իրականացնել»,- պարզաբանում է ՊԵԿ-ը։
Անդրադառնալով կոնկրետ բացահայտված դեպքին, կոմիտեն հայտարարում է, որ մաքսանենգ ծխախոտի դեպքով մաքսային մարմնի գործողությունները բխել են օրենսդրության պահանջներից, հետևաբար, մաքսային ծառայողներին կարգապահական պատասխանատվության ենթարկելու հիմքեր չկան:
Հիշեցնենք՝ ռուսաստանյան աղբյուրները ապրիլի 25-ին հայտնեցին, որ ՌԴ ԱԴԾ և մաքսային ծառայության աշխատակիցները Կրասնոդարի օդանավակայանում առգրավել են մաքսանենգ ծխախոտի 2700 տուփ, և տարբեր ապրանքանիշների տուփերի վրա հայկական ակցիզ է եղել:
Ըստ հաղորդագրությունների` ապրանքը Կրասնոդարի և Դուշանբեի կանգառներով Հայաստանից Աֆղանստան էր տարվում։ Ընդ որում` նշվում էր, որ տրանզիտային օդանավը պատկանում է ՀՀ ԱԻ նախարարությանը։
Ավելի ուշ ՀՀ ԱԻՆ–ն արձագանքեց այս հայտարարությանը՝ նշելով.
«Արտակարգ իրավիճակների նախարարությունն օդանավ չունի»:
Հայաստանյան լրատվամիջոցներն արդեն տևական ժամանակ է` փորձում են պարզել, թե ում է պատկանում մաքսանենգ ուղեբեռը: Տարբեր լրատվամիջոցներում շոշափվել են Նիկոլ Փաշինյանի կնոջ եղբոր՝ պատգամավոր Հրաչյա Հակոբյանի, ՊԵԿ փոխնախագահներ Ռաֆիկ Մաշադյանի ու Շուշանիկ Ներսիսյանի, «Զվարթնոց» օդանավակայանի (արևմտյան մաքսատուն) պետ Տիգրան Զաքարյանի, ինչպես նաև «Արմենիան Տոբակո Քոմփանի» ՍՊԸ սեփականատեր, ՊԵԿ նախկին նախագահ Վարդան Հարությունյանի անունները:
Մայիսի 7 – ին «Արմենիան տոբակո քոմփանի» ընկերությունը հայտարարություն տարածեց, որում հայտնում էր, որ որևէ առնչություն չունի մաքսանենգ եղանակով ՌԴ տարածքում հայտնաբերված ծխախոտային արտադրանքի տեղափոխման հետ, քանի որ իր արտադրանքը վաճառել է միջազգային դիստրիբյուտորական ընկերությանը` նրա հետ սահմանված կարգով կնքելով մատակարարման պայմանագիր։
Սահմանված կարգով կազմվել են բեռը ուղեկցող բոլոր փաստաթղթերը, և արտադրանքը ՀՀ տարածքում հանձնվել է գնորդ կազմակերպությանը և այդ պահից սկսած այդ ապրանքի համար այլևս որևէ պատասխանատվություն չի կրում:
Հայկական ծխախոտի «թանձր ծուխը». ո՞ւմ է պատկանում ՌԴ հասած 40 տոննա մաքսանենգ սիգարետը
Աղմկահարույց թեմային օրեր առաջ անդրադարձել էր նաև ՀՀ երրորդ նախագահի փեսա, Վատիկանում ՀՀ նախկին դեսպան Միքայել Մինասյանը` ասելով, որ ծխախոտի այդ խմբաքանակը Երևանում գնել է Նիկոլ Փաշինյանի եղբորորդին՝ «Իմ քայլի» պատգամավոր Սիփան Փաշինյանը՝ այն մաքսանենգ ճանապարհով ՌԴ արտահանելու ու այնտեղ վաճառելու նպատակով: Իսկ Սիփան Փաշինյանին ՀՀ մաքսային մարմիններում այդ հարցում աջակցել է Փաշինյանի տիկինը՝ Աննա Հակոբյանը՝ այնտեղ իր «դրածո» ՀՀ ՊԵԿ նախագահի տեղակալ Շուշաննա Ներսիսյանի միջոցով: Իսկ որպես միջնորդ հանդես է եկել Աննա Հակոբյանի եղբայրը՝ «Իմ քայլի» պատգամավոր Հրաչյա Հակոբյանը:
Մինասյանը հայտարարել էր նաև, որ մաքսանենգ ուղեբեռը ՌԴ Կրասնոդար քաղաքում հայտնաբերվել է, քանի որ ՀՀ ԱԱԾ-ն մինչ այդ «օպերատիվ տվյալներ է փոխանցել» ռուսաստանցի գործընկերներին:
Եվ հիմա, նախկին դեսպանի խոսքով, ՀՀ իշխանությունը ԱԱԾ-ում ջնջում է ծխախոտի բոլոր հետքերը և միաժամանակ ազատվում այդ գործի հետ առնչություն ունեցող ԱԱԾ ավելի քան 20 բարձրաստիճան սպաներից: Նրա խոսքով՝ ԱԱԾ-ում հիմա «չիստկաներ են»:
Միքայել Մինասյանն առաջարկում է վարչապետի պաշտոնից հեռացնել Նիկոլ Փաշինյանին
