ԵՐԵՎԱՆ, 12 նոյեմբերի – Sputnik. ՀՀ երկրորդ նախագահ Ռոբերտ Քոչարյանի դեմ հարուցված քրեական գործով դատախազ Պետրոս Պետրոսյանին Քոչարյանի պաշտպանները բացարկ հայտնեցին։ Այս մասին հայտարարեց Քոչարյանի պաշտպան Հովհաննես Խուդոյանը` Երևանի ընդհանուր իրավասության դատարանում ընթացող նիստի ժամանակ։
«Ամբողջ դատավարական պրոցեսն ընթացել է կոպիտ խախտումներով, որոնք արձանագրվել են դատարանների կողմից։ Պետրոսյանի գործողությունները խաթարել են գործի քննության ընթացքին։ Ավելին, դատախազի գործողությունները եղել են Քոչարյանին հնարավորինս շատ տհաճություններ պատճառելու տրամաբանությամբ»,–ասաց նա։
Խուդոյանի խոսքով` Պետրոսյանը կանխակալ վերաբերմունք է ցուցաբերել Քոչարյանի գործում։
Դատավոր Աննա Դանիբեկյանը հայտարարեց, որ աշխատանքային օրվա ավարտի հետ կապված` այսօրվա դատական նիստը հետաձգվում է։ Հաջորդ դատական նիստը կկայանա նոյեմբերի 19–ին, ժամը 13։00–ին։
Հիշեցնենք, որ այսօր կայացած դատական նիստի ժամանակ Քոչարյանի պաշտպանները դատավոր Աննա Դանիբեկյանին ինքնաբացարկի միջնորդություն ներկայացրին։ Դատարանը մերժեց միջնորդությունը։
Նոյեմբերի 5-ին Ռոբերտ Քոչարյանի փաստաբանները նրա խափանման միջոց կալանքը փոխելու և իրենց պաշտպանյալի նկատմամբ որպես խափանման միջոց գրավը կիրառելու միջնորդություն էին ներկայացրել։
Նոյեմբերի 7–ին Երևանի ընդհանուր իրավասության դատարանի դատավոր Աննա Դանիբեկյանը մերժեց Քոչարյանի խափանման միջոցը փոխելու միջնորդությունը` նրան թողնելով կալանքի տակ։
Սեպտեմբերի 20–ին էլ Երևանի ընդհանուր իրավասության դատարանն էր մերժել Քոչարյանին գրավի դիմաց ազատ արձակելու միջնորդությունը, որը ներկայացրել էր փաստաբան Հովհաննես Խուդոյանը:
Հայաստանը պատրա՞ստ է վատ սցենարների. Քոչարյանը` Փաշինյանի, Արցախի ու Ռուսաստանի մասին
2018 թվականի հուլիսի 26-ին Մարտի 1-ի գործով Հատուկ քննչական ծառայությունում քննվող քրեական գործով Հայաստանի երկրորդ նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-րդ հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը:
