ԵՐԵՎԱՆ, 12 նոյեմբերի — Sputnik. ՀՀ երկրորդ նախագահ Ռոբերտ Քոչարյանի դեմ հարուցված քրեական գործով դատավոր Աննա Դանիբեկյանին Քոչարյանի պաշտպաններն ինքնաբացարկի միջնորդություն ներկայացրին։ Այս մասին հայտարարեց պաշտպան Հովհաննես Խուդոյանը` Երևանի ընդհանուր իրավասության դատարանում ընթացող նիստի ժամանակ։
«Հաշվի առնելով դատարանի պարբերաբար կողմնակալ վերաբերմունքը մեր ներկայացրած գրավի միջնորդությունը մերժելու առնչությամբ Աննա Դանիբեկյանին ներկայացնում ենք ինքնաբացարկի միջնորդություն։ Դատական նիստերի ընթացքն ու այդ ընթացքում դատավորի կայացրած որոշումները ցույց են տալիս, որ Դանիբեկյանը կանխակալ բացասական վերաբերմունք ունի քրգործի և Ռոբերտ Քոչարյանի վերաբերյալ»,–ասաց Խուդոյանը։
Դատավորի` Քոչարյանին ուղղված հարցին, թե միանո՞ւմ է պաշտպանների ներկայացրած միջնորդությանը` Քոչարյանը հումորով պատասխանեց` կասկածո՞ւմ եք։ Մեկ այլ հարցի, թե որևէ ավելացնելու բան ունի` Քոչարյանն արձագանքեց. «Լավ բաներ չեմ ասելու, դրա համար էլ ոչինչ չեմ ասի»։
Դատարանը գնաց խորհրդակցական սենյակ։ Դատավորի ինքնաբացարկի մասին որոշումը կհրապարակվի այսօր, ժամը 16։00–ին։
Արսեն Բաբայանն ազատ կարձակվի. որոշումը կայացվել է
Հիշեցնենք, որ նոյեմբերի 5-ին Ռոբերտ Քոչարյանի փաստաբանները նրա խափանման միջոց կալանքը փոխելու և իրենց պաշտպանյալի նկատմամբ որպես խափանման միջոց գրավը կիրառելու միջնորդություն էին ներկայացրել։ Նոյեմբերի 7–ին Երևանի ընդհանուր իրավասության դատարանի դատավոր Աննա Դանիբեկյանը մերժեց Քոչարյանի խափանման միջոցը փոխելու միջնորդությունը` նրան թողնելով կալանքի տակ։
Քոչարյանի փաստաբանները «քարը քարի վրա չեն թողնելու»
Սեպտեմբերի 20–ին էլ Երևանի ընդհանուր իրավասության դատարանն էր մերժել Քոչարյանին գրավի դիմաց ազատ արձակելու միջնորդությունը, որը ներկայացրել էր փաստաբան Հովհաննես Խուդոյանը:
