ԵՐԵՎԱՆ, 6 սեպտեմբերի — Sputnik. Դավիթ Անանյանն հերթական աշխատանքային այցով մեկնել է Գյումրի: Նրա գլխավորած աշխատանքային խումբը շրջել է շինհրապարակում, դիտարկել աշխատանքային գործընթացը և արձանագրել, որ ավտոմաքսատան շինարարական աշխատանքների տեմպերն այդքան էլ չեն գոհացնում: Այդ մասին հայտնում են ՊԵԿ տեղեկատվության և հասարակայնության հետ կապերի բաժնից։
«Նախանշված ժամկետները պետք է պահպանել, և եթե ընթացքում անհրաժեշտությունն առաջանա, շինարարությունը կիրականացվի 24-ժամյա աշխատանքային ռեժիմով»,- նշված է հաղորդագրության մեջ:
Սպասարկման կենտրոն կառուցելու համար հատկացված 21,5 հա տարածքից այժմ ավտոմաքսատան համար նախատեսված 5,5 հեկտարում է մեծածավալ շինարարություն ընթանում: Կոմիտեի ղեկավարը վերահաստատել է, որ շենքը շահագործման կհանձնվի հեկտեմբերի 11-ին։
«Շինարարությունը քայլ առ քայլ իրականություն է դառնում: Աշխատուժի պակաս էլ չկա: Այժմ շուրջ 160 հոգի է այստեղ աշխատում, սակայն հետագայում՝ 24-ժամյա գրաֆիկի անցնելիս` աշխատողների թիվը կարող է հասնել 350-ի: Իսկ տարածքում ստորգետնյա ջրերի բարձրացումը խնդիր չի առաջացնի. դեռևս նախագծման փուլում հետազոտություններ են արվել, ճարտարապետական ու շինարարական լրացուցիչ խնդիրներ են դրվել և հաղթահարվել: Հիմքերն ամուր են, բետոնացման ծավալները՝ նախատեսվածից ավելին: Շենքը շահագործման կհանձվի սահմանված ժամկետում»,- ասել է կոմիտեի ղեկավարը:
Դավիթ Անանյանն էլ ընդգծել է, որ ավտոմաքսատունը հոկտեմբերի 11-ին բացելը կարևոր մարտահրավեր է իրենց համար:
«Մենք ինքներս մեզ համար մարտահրավեր և այդպիսի նշաձող ենք սահմանում: Կարծում եմ` ցանկացած ոլորտում, եթե ցանկացած նախաձեռնության մեջ հավակնոտ նշաձող չես սահմանում, ուղղակի հաջողություն չես ունենում և առաջընթաց չես ապահովում»,- ընդգծել է Անանյանը:
Շրջայցի ընթացքում ի հայտ եկած խնդիրների մասին ՊԵԿ նախագահը խորհրդակցություն է անցկացրել Հյուսիսային մաքսատուն-վարչությունում: Նա հանձնարարել է ի մի բերել շինարարական թերացումներն ու շտկել դրանք: Դավիթ Անանյանն ընդգծել է շինարարական աշխատանքները բարձր որակով և ժամանակին ավարտին հասցնելու անհրաժեշտությունը:
Դեղձերն անցան, խնդիրը մնաց․ ինչ չեն կարողանում կիսել «Սպայկան» ու ռուս մաքսավորները
Գյումրու ավտոմաքսատունը նույնպես մեկ պատուհանի սկզբունքով իրականացնելու է ծառայություններ: Իսկ դա նշանակում է, որ կկատարվեն ոչ միայն մաքսային ձևակերպումներ, այլև տրանսպորտային միջոցների հաշվառում և պետհամարանիշի ստացում: Հաշվի առնելով ավտոմեքենաների ներկրման կանխատեսվող ծավալները՝ արդեն հոկտեմբերին այստեղ օրական կմաքսազերծվի 800-1000 մեքենա:
Ո՞վ կկառուցի Գյումրու մաքսատունը. ՊԵԿ–ը պարզաբանեց, թե ինչպես է ընտրվել «Մերձմոսկովյանը»
Հիշեցնենք` ավտոմեքենաների մաքսազերծման գործընթացը Գյուրիում կազմակերպելու առաջարկն արել էր ՀՀ վարչապետը` Արարատյան մաքսատուն կատարած իր այցելության ընթացքում։
Ներկայում ավտոմեքենաների մաքսազերծումն իրականացվում է Նորագավիթում տեղակայված Արարատյան մաքսատուն վարչության ավտոտրանսպորտային միջոցների մաքսային ձևակերպման բաժանմունքում, որտեղ հսկայական հերթեր են գոյանում։
