ԵՐԵՎԱՆ, 26 հուլիսի — Sputnik. Հայաստանի նախկին իշխանություններն էներգետիկայի ոլորտում կնքել են մի քանի պայմանագրեր, որոնք ուղղակի ոտնահարել են երկրի շահերը։ Այս մասին Սանկտ Պետերբուրգ կատարած այցի ընթացքում հայազգի գործարարների հետ հանդիպման ժամանակ ասել է Հայաստանի վարչապետը։ Նիկոլ Փաշինյանը տարակուսանք է հայտնել, թե «ինչպե՞ս դուրս գա այս փոսից»։
«էներգետիկայի ոլորտում կան վարկային ծրագրեր, որոնք չեն իրագործվում ոչ Հայաստանի մեղքով։ Ամեն ամիս Հայաստանը վճարում է վարկերի սպասարկման համար, որոնք չեն մտնում երկիր։ Պարզվում է, որ մեր երկրում եղել են մարդիկ, որոնք ստորագրել են այդ թղթերը։ Կարծում եք` նրանք չեն հասկացե՞լ, թե ինչ են ստորագրում։ Կներեք, չեմ հավատում», – ասել է Փաշինյանը։
Նա հավելել է, որ բոլորը հիանալի իմացել են ամեն ինչի մասին և իմանալով արհամարհել են Հայաստանի շահերը հանուն իրենց գրպանի։ Վարչապետը նշել է, որ նման ծրագրերը շատ են եղել։
Փաշինյանը խոստովանել է, որ երկու շաբաթ առաջ անցկացրել է աշխատանքային խորհրդակցություն էներգետիկ ռազմավարություն մշակելու թեմայով։ Սակայն այս ոլորտում առկա այնքան խնդիր են քննարկել, որ ռազմավարությանը չեն հասել։
«Ինչպես դուրս գամ այս փոսից այն դեպքում, երբ ակնհայտ է, որ Հայաստանը շահերը ոտնահարված են։ Ինչին կպնում ենք, մեզ ասում են, որ այստեղ կետ կա, ըստ որի կարող են Միջնորդական դատարան դիմել», – ասաց Փաշինյանը։
Չնայած այդ բարդություններին` Փաշինյանը ծրագրում է խելքի բերել այս ոլորտը։ Նա նաև պատմեց Հայաստանի բնակչությանը ռուսական գազն անարդար բաշխելու մասին։
Նա բացատրեց, որ Հայաստանը սահմանին գազը գնում է 150 դոլարով, իսկ բնակիչների տներ է մտնում 1 խորանարդ մետր համար 300 դոլարով։
