ԵՐԵՎԱՆ, 29 մայիսի — Sputnik. ԱԺ նախագահ Արա Բաբլոյանին Սարդարապատի տոնակատարությանը չհրավիրելն անցումային շրջանով պայմանավորված լուրջ բացթողում է։ Այսօր ԱԺ-ում լրագրողների հետ զրույցում ասաց ՀՀ վարչապետ Նիկոլ Փաշինյանը` հավելելով, որ իշխանության այդ գործողություններում մանրախնդրության որևէ էլեմենտ չի եղել։
«Ես հասկանում եմ, որ Հայաստանում ավանդույթ կա` բոլոր հարցերը պետք է լուծվեն վարչապետի մակարդակով` սկսած փողկապի գույնից մինչև դեմքի արտահայտություն։ Ու քանի որ գործող վարչապետը հարկ չի համարում բոլոր մանրամասների մեջ մտնել` ով ինչ ասի, ինչ խոսի, դեմքի ինչ արտահայտություն ունենա, այդպիսի թյուրիմացություններ կլինեն»,- ասաց Փաշինյանը։
Մայիսի 28-ի միջոցառումներում որոշ խնդիրներ Նիկոլ Փաշինյանն ինքն էլ է նկատել։
«Որոշ անընդունելի բաներ, թյուրիմացություններ կային»,- ասաց նա` համոզմունք հայտնելով, որ առաջիկայում դրանք կլուծվեն։
Նշենք, որ երեկ` մայիսի 28-ին, Առաջին Հանրապետության 100-ամյակին նվիրված միջացառմանը ներկա չէր ԱԺ ղեկավարությունը։
ՀՀ վարչապետի աշխատակազմի ղեկավար Էդուարդ Աղաջանյանի օգնական Տիգրան Մուղնեցյանը Sputnik Արմենիային ասել էր, որ ավելի կարևորել են տոնական միջոցառումներին քաղաքացիական հասարակության, ակտիվիստների, մարտի 1–ի զոհերի և սոցիալական այլ շերտերի ներկայացվածությունը, այդ իսկ պատճառով էլ սահմանափակ տեղերի պարագայում որոշել են օպտիմալ վերանայում կատարել և պատգամավորների ներկայացվածությունը սահմանափակել` ԱԺ բոլոր խմբակցություններին ուղարկելով սահմանափակ թվով հրավերներ։ Ինչ վերաբերում է Արա Բաբլոյանին ի պաշտոնե չհրավիրելու հանգամանքին, Մուղնեցյանը Բաբլոյանին սեփական կուսակցությունից անջատելը նույնիսկ սխալ էր համարել։
