ԵՐԵՎԱՆ, 29 մայիսի — Sputnik, Անի Լիպարիտյան. Հայ ժողովուրդը շատ տաղանդավոր է և միևնույն ժամանակ յուրօրինակ։ Sputnik Արմենիայի հետ զրույցում նման կարծիք հայտնեց լիտվացի լրագրող Դենիս Կիշենևսկին։
Կիշենևսկին Erasmus+ և Եվրոպայի խորհրդի ծրագրերի շրջանակում զբաղվում է եվրոպական կրթական նախագծերով։ Հայաստան Դենիսն անցյալ ամառ եկել էր հենց նման նախագծերի իրականացման համար։ Դրանցից մեկը նվիրված էր ստեղծագործ մտածելակերպի զարգացման թեմային։
Լրագրողը նշեց, որ Լիտվայի թիմին հետաքրքիր էր ծանոթանալ նոր մշակույթի հետ, տեսնել, ինչպես է ապրում Հայաստանը, թեև այս ուղղությունը Բալթյան երկրների զբոսաշրջիկների համար ամենապահանջվածը չէ։
«Հայերն իրենց դրսևորեցին ամենատարբեր ոլորտներում` մշակույթից և արվեստից մինչև գիտություն և բժշկություն։ Այդ պատճառով, ըստ ինձ, «ստեղծագործ մտածելակերպ» թեմայով նախագիծը հենց Հայաստանի համար է», – կարծում է լրագրողը։
Արարատին նայելով վայելել նռան գինի
Հայաստանում Լիտվայի պատվիրակությունն անցկացրեց մոտ երկու շաբաթ, հիմնականում եղավ Երևանում։
Հայաստանի մայրաքաղաքի ջերմ ընտանեկան մթնոլորտը գերել էր Կիշենևսկուն։ Լիտվայի հյուրերը զմայլվում էին քաղաքի կենտրոնում գտնվող լայն պողոտաներով, ստվերոտ պուրակներով, շատրվաններով, ինչպես նաև դեպի Արարատը բացվող հիանալի տեսարանով, որը կարելի է որսալ Կասկադի վերևի դիտահարթակից։
Լիտվացիներին շատ են գերել երեկոյան խնջույքները` նռան գինով։
Լրագրողի կարծիքով` Երևանը ոչինչով չի զիջում մեծ եվրոպական քաղաքներին։
Միակ բանը, ինչը լիտվացիների սրտով չէր, Հայաստանին բնորոշ շոգն էր։ Մի քանի օր շարունակ բարձր ջերմաստիճանը պահպանվում էր, այդ պատճառով Լիտվայից ժամանած հյուրերին, որոնք ավելի մեղմ եղանակի են սովոր, դժվար էր հարմարվել տեղի կլիմայական պայմաններին։
Բարեհամբույր ու խիստ մարդիկ են
Լիտվացի հյուրերը եղան ոչ միայն մայրաքաղաքում, այլև այցելեցին Գառնի, և Սևանա լիճ։
«Երկար ուսումնասիրում էինք Գեղարդի վանական համալիրը։ Յուրաքանչյուրն այս վայրը յուրովի է ընկալում, սակայն ինձ համար այն ոչ միայն Հայաստանի խորհրդանիշ դարձավ, այլև ողջ քրիստոնյա աշխարհի», – նշեց Դենիսը։
Հայաստանը ոչ միայն քրիստոնեական և եվրոպական քաղաքակրթության բնօրրանն է, այլև ֆորպոստ դեպի առեղծվածային և ոչ պակաս հետաքրքիր Արևելքը, կարծում է լրագրողը։
Տեղի բնակիչների հետ զրուցելիս` Դենիսը եկավ այն եզրակացության, որ հայերը շատ բարեհամբույր և ընկերասեր ժողովուրդ են, սակայն յուրաքանչյուրն իր բնավորությունն ունի։
Նա նաև նշեց, որ Մերձբալթյան երկրների բնակիչները հարգանքով են վերաբերվում բարեկամական Հայաստանին, հիանում են, թե որքան բարձր են հայերը գնահատում իրենց մշակույթը և լավ գիտեն իրենց պատմությունը, կարող են ժամերով պատմել դրա մասին։
Եվրոպայում բավական հազվադեպ կարելի է հանդիպել երիտասարդների, որոնք այդքան խորը գիտելիքներ ունեն սեփական երկրի պատմության և մշակույթի մասին, ինչպես նաև ակտիվ քաղաքացիական դիրքորոշում ունեն, ավելացրեց Դենիսը։
Լիտվայի հյուրին դուր չեն եկել մեր անհարմար փողոցները, Հայաստանի տարբեր հատվածներում ենթակառուցվածքների բացակայությունը։ Նա զարմացած էր նաև գյուղերում ապրողների աղքատ ապրելակերպը։
Սակայն, ինչպես նշեց Դենիսը, հիանալի բնությունը և հյուրընկալ ժողովուրդը կոմպենսացնում են այդ ամենը։ Իսկ ավանդական ուտեստները լիտվացիներն այնքան են հավանել, որ նրանք նույնիսկ որոշել են խորոված անել բնության գրկում` ազգային խոհանոցն ու երկրի մթնոլորտը վայելելու ու զգալու համար։
