ԵՐԵՎԱՆ, 11 մարտի — Sputnik, Անի Լիպարիտյան․ Պենզայի բնակչուհի Եկատերինա Բելոուսովան ընկերների հետ հինգ օրով էր եկել Հայաստան, բայց երկիրն այնքան է դուր եկել նրան, որ աղջիկն արդեն փափագում է կրկին գալ այստեղ։ Եկատերինան արդեն որոշել է՝ հաջորդ Հայաստան այցի ժամանակ անպայման պետք է լողա հանրահայտ Սևանա լճում։
Ինչպես պատմեց Եկատերինան, մարտ ամսվա հանգստյան օրերի ուղևորությունը լավ է անցել, սակայն անձրևոտ եղանակը մի քիչ խանգարել է, քանի որ հյուրերը ցանկացել են վայելել արևոտ Երևանը։
«Ճանապարհորդության մի քանի օրերի ընթացքում հասցրեցինք տեսնել Կասկադը, որը տպավորեց մեզ։ Շատ հավանեցինք մայրաքաղաքի կենտրոնը, զբոսնեցինք Հանրապետության հրապարակում, Հաղթանակի այգում։ Եղել ենք նաև Գառնիում, Գեղարդում», — ասաց Sputnik Արմենիայի զրուցակիցը։
Մերձվոլգյան բարձունքում տեղակայված քաղաքի հյուրերը կարծում են, որ հայերը բարյացակամ են ու բարեհամբույր, նրանց հետ հաճելի է շփվելը։ Զբոսաշրջիկները Հայաստանում չեն բախվել բարդությունների հետ։
Բացի այդ, զբոսաշրջիկների գնահատականներով՝ Հայաստանը հիանալի խոհանոց ունի։ Եկատերինան Հայաստանում համտեսել է տոլմա, խորոված, հոնի կոմպոտ։ Զբոսաշրջիկներն ամեն օր ինչ-որ նոր ուտեստ են փորձել ազգային խոհանոցից։
«Մենք կհիշենք Հայաստանն իր հնագույն եկեղեցիներով, գեղատեսիլ բնությամբ, բարի ու սրտաբաց մարդկանցով, կոնյակով ու խորովածով։ Դե, իհարկե, մեծ տպավորություն գործեցին լեռները»,–հավելեց Եկատերինան։
Ռուս զբոսաշրջիկը խոստովանեց, որ ամռանը հաճույքով կվերադառնա Հայաստան, քանի որ երկիրը միայն դրական հույզեր է առաջացնում։
