ԵՐԵՎԱՆ, 9 մայիսի — Sputnik. ՀՀ ԱԳ փոխնախարար Շավարշ Քոչարյանը պատրաստ է աշխատել Նիկոլ Փաշինյանի ղեկավարած կառավարությունում։ Այս մասին նա այսօր լրագրողներին հայտնել է Հաղթանակի զբոսայգում։
«Ես պետական ծառայող եմ, և ցանկացած կառավարության դեպքում իմ գործն աշխատելն է։ Պետական ծառայողը պետք է ոչ թե անձին ծառայի, այլ պետությանը, և եթե օգտակար կլինի իմ ծառայությունը, ես պատրաստ եմ աշխատել»,– ասել է նա։
Շավարշ Քոչարյանը նաև ասել է, որ համաժողովրդական շարժումը լավ նախադրյալներ է ստեղծել առաջընթացի, այդ թվում` արտաքին քաղաքականության, քանի որ նրա համոզմամբ` Հայաստանի հետ այժմ ավելի շատ են հաշվի նստելու, քան նախկինում:
ԱԳ փոխնախարարը նշել է, որ ՀՀ արտաքին քաղաքականության հավասարակշռված մոտեցումը չի փոխվելու, և Հայաստանի նոր կառավարությունը պետք է հետամուտ լինի, որպեսզի բոլոր հարաբերություններում լինի և՛ հավասարություն, և՛ պետական շահի առաջնահերթություն։
