ԵՐԵՎԱՆ, 26 ապրիլի — Sputnik. «Տորոնտոյի մարդասպան» Ալեք Մինասյանի զոհերից մեկը կարող էր դառնալ Կանադայի 90-ամյա բնակիչ, ԽՍՀՄ-ում ծնված Ալեքսանդրա Կոժևնիկովան։ Տորոնտոյում Ռուսաստանի հյուպատոսարանի տվյալներով` կինն աշխատանքի վետերան է, ունի միաժամանակ ռուսական և կանադական անձնագրեր։
Ֆուրգոնը, որով սլացել է Մինասյանը, դիպել է նրան, և կինն ընկել է գետնին։ Բժիշկները տուժածին ժամանակին են օգնություն ցուցաբերել։
Հիշեցնենք, որ 25-ամյա Ալեք Մինասյանը Կանադայի Տորոնտո քաղաքում ավտոֆուրգոնով վրաերթի է ենթարկել մարդկանց։ Մահացել են 10 մարդ, ևս 15-ը ստացել են տարբեր աստիճանի վնասվածքներ։ Վարորդը մայթով սլացել է մոտ երկու կիլոմետր` մեքենայի տակ գցելով մարդկանց։
Կանադայի վարչապետ Ջասթին Տրյուդոն, մեկնաբանելով ողբերգությունը, հայտարարել է, որ իշխանություններն ահաբեկչության նշաններ չեն տեսնում։
Մինասյանի դրդապատճառներն անհայտ են։ Ձերբակալության պահին նա խնդրել է, որ ոստիկանները սպանեն իրեն։
