«Օսեթիայից մեզ տեղեկացրին, որ տեղումները դադարել են, Վրաստանի հատվածում` նույնպես։ Այսօր կեսօրից հետո իրավիճակի փոփոխություն է սպասվում։ Սակայն սա զուտ վարկած է, որ տեսնենք` Լարսը կբացվի, թե ոչ։ Մենք մշտապես կապի մեջ ենք թե՛ Վրաստանի, թե՛ Օսեթիայի մեր գործընկերների հետ»,- ասաց Ճաղարյանը։
ԱԻՆ-ի պաշտոնական կայքում մշտապես թարմացվում է ճանապարհների վերաբերյալ տեղեկությունը, և բոլորը կարող են տեղեկանալ, թե ինչ իրավիճակ է տիրում Վերին Լարսում։
«Ինչ վերաբերում է տրանսպորտային կուտակումներին, ապա դրանք առկա են ինչպես ռուսական, այնպես էլ վրացական հատվածում։ Օգնության համար դեռ ոչ ոք ԱԻՆ չի դիմել։ Մեր գործընկերները հայտնում են, որ իրավիճակը բավականին կայուն է»,- ասաց Ճաղարյանը։
Նրա խոսքով, առայժմ արգելափակված ավտոմեքենաներ կան միայն Սոթք-Քարվաճառ ավտոճանապարհին։ Ուղևորներին, վարորդներին դուրս են բերել այդ տարածքից։
Սոթք-Քարվաճառ ավտոճանապարհին տեխնիկան սկսել է արդեն աշխատել, և հավանաբար որոշ ժամանակ անց իրադրությունը դրական ընթացք կստանա։
