ԵՐԵՎԱՆ, 6 դեկտեմբերի — Sputnik. Հայկական քոչարին ՅՈՒՆԵՍԿՕ-ն ընդգրկել է մարդկության ոչ նյութական մշակութային ժառանգության ցանկում: Այդ մասին ասված է կազմակերպության պաշտոնական էջում։
Կազմակերպությունը նաև ծավալուն տեղեկություն է հրապարակել, թե ինչ պար է քոչարին, ինչ է խորհրդանշում և ինչ նշանակություն ունի հայ ազգի կյանքում։
«Քոչարին ավանդական պար է, որը լայնորեն կատարվում է ամբողջ Հայաստանում` տոների, տոնական միջոցառումների, ընտանեկան արարողությունների և այլ հասարակական միջոցառումների ժամանակ: Այն բաց է բոլոր մասնակիցների համար` անկախ տարիքից, սեռից կամ սոցիալական կարգավիճակից»,- ասված է հաղորդագրության մեջ։
ՅՈՒՆԵՍԿՕ-ն քոչարին որակում է որպես «ազգային ինքնություն և համերաշխություն քարոզող պար, որը նպաստում է պատմական, մշակութային և էթնիկ հիշողությունների շարունակականությանը, խթանում փոխադարձ հարգանքը համայնքի բոլոր տարիքի անդամների միջև»:
Իսկ 2008 թ-ից պարբերաբար իրականացվում է «Մեր պարերը և մենք» նախաձեռնությունը, որը նպաստում է փորձառու մասնագետների միջոցով ազգային պարի այդ տեսակի պահպանմանը, տարածմանն ու փոխանցմանը։
