ԵՐԵՎԱՆ, 10 հոկտեմբերի — Sputnik. Ազգային անվտանգության ծառայության աշխատակիցների ձեռնարկած լայնածավալ օպերատիվ-հետախուզական միջոցառումների շնորհիվ բացահայտվել են արդարադատության նախարարության «Վանաձոր» քրեակատարողական հիմնարկի պետի, օպերատիվ բաժնի պետի և այլ ծառայողների՝ նախնական համաձայնությամբ 2017 թվականի ընթացքում քրեակատարողական հիմնարկում պահվող դատապարտյալներից կաշառք պահանջելու և ստանալու դեպքեր, հայտնում է գլխավոր դատախազությունը:
Հարուցվել է քրեական գործ, որը գլխավոր դատախազությունն ուղարկել է հատուկ քննչական ծառայություն՝ նախաքննությունը շարունակելու համար:
Քրեական գործով կատարված նախաքննությամբ բավարար ապացույցներ են ձեռք բերվել այն մասին, որ ԱՆ «Վանաձոր» քրեակատարողական հիմնարկի պետը, օպերատիվ բաժնի պետը և այլ ծառայողներ, 2017 թվականի ընթացքում շահադիտական շահագրգռվածությունից ելնելով, իրենց պաշտոնեական դիրքը ծառայության շահերին հակառակ օգտագործելով, նախնական համաձայնությամբ «Վանաձոր» քրեակատարողական հիմնարկում պահվող դատապարտյալներից պարբերաբար պահանջել և որպես կաշառք ստացել են տարբեր չափերի գումարներ:
Քրեական գործով կաշառք ստանալու կասկածանքով ձերբակալվել են «Վանաձոր» քրեակատարողական հիմնարկի պետը, օպերատիվ բաժնի պետը և նրանց կաշառք տված անձը:
Քրեական գործով կատարվում են անհետաձգելի բազմաթիվ քննչական գործողություններ:
