ԵՐԵՎԱՆ, 8 օգոստոսի — Sputnik. «Ելք»-ը միակ քաղաքական ուժն է, որը տարբերվում է երկրի ապագայի մասին իր մոտեցումներով, նման կարծիք է հայտնել ԱԺ «Ելք» խմբակցության պատգամավոր Արամ Սարգսյանը tert.am կայքում։
«Այն համակարգը, որում գործում են Կարեն Կարապետյանը, Սերժ Սարգսյանը, այլ մի ՀՀԿ-ական կամ ՀՅԴ-ն, որևէ բան փոխել չի կարողանալու: Այդ համակարգն իր դրած հիմքի դեմ պայքարել չի կարող»,- ասել է Սարգսյանը` որպես հիմնական խնդիր մատնանշելով իշխանական համակարգում արմատացած կոռուպցիան։
Իշխանությունները խնդիր են դրել պառակտել «Ելք»-ը, համոզմունք է հայտնել Արամ Սարգսյանը` վկայակոչելով ԱԺ ՀՀԿ խմբակցության ղեկավարի հայտարարությունն այն մասին, որ մինչև 2018 թ.-ը կտեսնենք՝ կպառակտվի՞ «Ելք»-ը, թե՞ կմնա:
«Վստահաբար, Սերժ Սարգսյանն իջեցրել է «Ելքը» քայքայելու հրահանգ, դա երևում է նրանց սպասարկող լրատվամիջոցներից»,- ասել է Արամ Սարգսյանը։
Խորհրդարանում չներկայացված ՎՍԴՀ կուսակցության ատենապետ Լյուդմիլա Սարգսյանն էլ կարծիք է հայտնել, որ ընդդիմադիր քաղաքական դաշտը թույլ դիրքերում է։ Նոր համակարգը, նրա խոսքով, ոչ թե ամրացրեց, այլ թուլացրեց կուսակցությունները, իսկ համախմբման փոխարեն, իրականում, պառակտում է տեղի ունենում:
Անդրադառնալով ԵԱՏՄ-ից դուրս գալու «Ելք»–ի, մասնավորապես` Էդմոն Մարուքյանի նախաձեռնությանը, ՎՍԴՀԿ ատենապետը կարծիք է հայտնել, որ այն քաղաքական ուժերի կողմից աջակցություն չի ստանա։ Ավելին, Լյուդմիլա Սարգսյանի խոսքով՝ հենց «Ելքում» այդ նախաձեռնությանը ոչ բոլորն են աջակցում։
««Ելք»-ի անդամների մի մասը կողմ արտահայտվեց դուրս գալուն, մյուս մասը լռեց՝ հասկանալով, թե ինչ գործընթացներով է դա հղի Հայաստանի համար: Մենք չունենք այդ ռեսուրսը: Բազմաթիվ երկրներ այսօր մտել են ԵԱՏՄ՝ հասկանալով, որ դա ոչ միայն տնտեսական հեռանկարներ ապահովող միավոր է, այլև, նախ և առաջ, քաղաքական միավոր է, որովհետև չկա տնտեսական միավոր առանց քաղաքական ակնկալիքի»,– ասել է Լյուդմիլա Սարգսյանը:
Քաղաքական գործիչը չի հերքել, որ Հայաստանում կան արևմտամետ տրամադրություններ, բայց այն, ինչ պահանջում է Էդմոն Մարուքյանը, անիրագործելի է:
«Չմտնելը մի բան է, մտնել, դուրս գալը՝ այլ բան»,– ասել է Սարգսյանը` հավելելով, որ Հայաստանում այսօր չկան վառ արտահայտված քաղաքական ուժեր ու գործիչներ ինչպես արևմտյան, այնպես էլ ռուսական ուղղվածության:
