Արցախի ընտրություններ. դեղագործն ընդդեմ իրավաբանի

ԵՐԵՎԱՆ, 18 հուլիսի — Sputnik. Արցախի հանրապետության նախագահական ընտրություններին առաջադրվել է երկու թեկնածու. գործող նախագահ Բակո Սահակյանն ու Արցախի ԱԺ «Շարժում 88» խմբակցության ղեկավար Էդուարդ Աղաբեկյանը։

Արցախի նախագահի ընտրությանն ընդառաջ Sputnik Արմենիան ներկայացնում է, թե ովքեր են առաջադրված թեկնածուներն ու ինչ ճանապարհ է անցել նրանցից յուրաքանչյուրը։

Բակո Սահակյանն արդեն 10 տարի զբաղեցնում է Արցախի նախագահի պաշտոնը։ Մինչ այդ` 2001 —2007թթ. –ին եղել է Արցախի ազգային անվտանգության պետվարչության պետ, Արցախի ազգային անվտանգության ծառայության տնօրեն, Արցախի ՊԲ թիկունքի շտաբի պետ, ՊԲ հրամանատարի տեղակալ, ներքին գործերի եւ ազգային անվտանգության նախարարի օգնական։ Ունի գեներալ-մայորի զինվորական կոչում:

Բակո Սահակյանը ծնվել է Ստեփանակերտում, 1960 թ–ի օգոստոսի 30-ին։ Ավարտել է Ստեփանակերտի թիվ 1 միջնակարգ դպրոցը, ծառայել է խորհրդային բանակում:

1981 թ.-ին աշխատանքի է ընդունվել  Ստեփանակերտի թիվ 9 արտադրական մեքենայացված կոմբինատում` որպես փականագործ-մեխանիկ: Աշխատել է Ստեփանակերտի շինանյութերի կոմբինատում` որպես քարջարդ բանվոր: Իսկ 1983-1987 թթ. աշխատել է հնությունների վերականգնման գիտական վարչության Ստեփանակերտի մասնաճյուղում` որպես վարպետ-ռեստավրատոր:

1988 թվականից մասնակցել է Արցախյան շարժմանը, ընդգրկվել Արցախի ինքնապաշտպանական ուժերում, 1992-1993 թթ. եղել է Արցախի ինքնապաշտպանության կոմիտեի պետի տեղակալ:

Ավարտել է Արցախի պետական համալսարանի իրավագիտության ֆակուլտետը։

Պարգևատրվել է Արցախի «Մարտական խաչ» 1-ին աստիճանի և Ռուսաստանի Դաշնության «Պետրոս Մեծ» 1-ին աստիճանի շքանշաններով, ՀՀ «Հայրենիքին մատուցած ծառայությունների համար» 1-ին աստիճանի, ՀՀ «Վազգեն Սարգսյան» եւ այլ մեդալներով:

ՌԴ անվտանգության, պաշտպանության եւ օրինապահպանության հարցերով ակադեմիայի իսկական անդամ է:

Բակո Սահակյանը 2 զավակների հայր է։

Էդուարդ Աղաբեկյանը «Շարժում-88» կուսակցության վարչության նախագահն է, 2015թ–ից նաև` Արցախի ԱԺ «Շարժում-88» խմբակցության ղեկավարը։

Ծնվել է 1963թ. հունիսի 2-ին ԼՂԻՄ Ասկերանի շրջանի Ակնաղբյուր գյուղում: Տեղի միջնակարգն ավարտելուց հետո ընդունվել է Երևանի Մխիթար Հերացու անվան պետական բժշկական ինստիտուտի դեղագործական ֆակուլտետը: Երևանից վերադառնալով աշխատել է ԼՂԻՄ Գլխավոր դեղատնային վարչությունում` որպես  դեղագետ,  վարիչի տեղակալ և վարիչ:

1992-1998թթ.` ծառայել է Արցախի ՊԲ շարքերում: Բժշկական ծառայության մայոր է: Մարտական խաչ 2-րդ աստիճանի շքանշանակիր:

2015 թ–ին «Շարժում-88» կուսակցության համամասնական ցուցակով ընտրվել է Արցախի 6-րդ գումարման Ազգային ժողովի պատգամավոր:

Էդուարդ Աղաբեկյանը ևս 2 զավակների հայր է։

Հավելենք, որ Արցախի Խորհրդարանի երեք խոշոր խմբակցություններ իրենց 28 պատգամավորներով հայտարարել են, որ քվեարկելու են գործող նախագահի օգտին։

Էդուարդ Աղաբեկյանի օգտին քվեարկելու են նրա ղեկավարած «Շարժում 88» խմբակցության 3 պատգամավորները։