ԵՐԵՎԱՆ, 18 հուլիսի–Sputnik. Ո՞Ւմ կցանկանայիք տեսնել նախագահ նոր Սահմանադրության շրջանակում. այս հարցն էր տվել Ահարոն Ադիբեկյանը նրանց, ովքեր հուլիսի 19–ին պետք է որոշում կայացնեն։ Ըստ սոցիոլոգիական հարցման արդյունքների` Բակո Սահակյանին բաժին էր հասել ձայների 85 տոկոսը, իսկ 9–12 տոկոսը կգնա Էդուարդ Աղաբեկյանին։
«Բակո Սահակյանի 10 տարվա նախագահության ընթացքում բնակչության թիվն աճել է 11 հազարով։ Ստեփանակերտի բնակչությունը 97 թվականին մոտ 55–56 հազար էր, նրա ընտրության օրն իջել էր 51 հազարի։ Հիմա վերականգնվել է թիվը՝ 56 հազար։ Թեպետ Արցախը պատերազմական դրության մեջ է, Բակո Սահակյանը Լևոն Հայրապետյանի օգնությամբ իրագործեց ծնելիության խթանման, երիտասարդ ընտանիքների աջակցման մեծ ծրագիր»,– ասաց Ադիբեկյանը։
Բակո Սահակյանին Ադիբեկյանն անվանում է առավել ընկալելի նախագահ, քանի որ ժողովրդավար է, «լավ է նայում» բնակչությանը, իսկ բանակը մարտունակ է։
«Նախագահ դառնալիս նա առաջինն արգելեց տուգանել վարորդներին։ Ասաց`այդ ինչքա՞ն գումար ունեն, որ սխալ անելու համար հանեն ու գումար տան։ Ասաց` ակտ եք կազմում, իսկ 3 ակտի դեպքում զրկում եք վարորդական իրավունքից։ Կրճատել տվեց ոստիկանների թիվն ու դրա հաշվին ավելացրեց նրանց աշխատավարձերը։ Մենք պետք է հպարտ լինենք, որ նման դեմք ունենք Արցախում»,– ասաց սոցիոլոգը։
Էդուարդ Աղաբեկյանին ևս Ահարոնյանը հավանության արժանացրեց` հետաքրքիր մարդ բնութագրելով։
«Նա բժիշկ է, դեղագործ, ծառայել է բանակում, եղել Ստեփանակերտի քաղաքապետ, վարչապետի խորհրդական։ Երիտասարդ է, գուցե հաջորդ ընտրություններում նրա թեկնածությունն ավելի ընկալելի լինի»,– ասաց Ադիբեկյանը։
Հիշեցնենք, որ փետրվարի 20–ին տեղի ունեցած սահմանադրական բարեփոխումների արդյունքում Արցախն անցավ կառավարման նախագահական ձևին։ Մինչև 2020 թվականը կղեկավարի խորհրդարանի ընտրած նախագահը, իսկ որոշակի իրավական կարգավորումներից հետո կանցկացվեն լիարժեք նախագահական ու խորհրդարանական ընտրություններ։
