ԵՐԵՎԱՆ, 19 ապրիլի — Sputnik. Օդանավակայանի Duty Free-ի խանութներում նռան և խաղողի տեսքով մագնիսները, ինչպես նաև խորովածի բույրով կամ հողով լցված տարաները խոսում են այն մասին, որ դուք Երևանում եք գտնվում։ Բարի գալուստ Հայաստան, գրում է Կովկասի մասին պատմող Jamnews միջազգային պարբերականը։
Պարբերականը խորհուրդ է տալիս Երևանի հետ ծանոթությունը սկսել մայրաքաղաքի սրտից` Հանրապետության հրապարակից, որտեղ գտնվում են պարող և երգող շատրվանները, քաղաքի գլխավոր ժամացույցը, Պատմության թանգարանն ու Ազգային պատկերասրահը։
«Հրապարակից կարելի է բարձրանալ դեպի Աբովյան փողոց, որտեղ կարելի է Երևանի մասին գրեթե բոլոր երգերում լսած վարդագույն տուֆից կառուցած մի քանի հին շենք տեսնել։ Դրանց մի մասը, ցավոք, չի պահպանվել, սակայն Աբովյան փողոցն, այդուամենայնիվ, ձեզ հին Երևան կտեղափոխի։ Այդ փողոցի վրա կարելի է մի շարք հուշանվերների խանութներ գտնել, մտնել «Դալան», Հայաստանը խորհրդանշող նռան, խաղողի, ծիրանի, խաչքարերի, դուդուկի և բիբլիական Արարատ լեռան պատկերներով հուշանվերներ գնել։ «Դալանի» հետևում դուք իսկական երևանյան հին բակ կտեսնեք` փայտից աստիճաններով և խաղողի վազերով։ Այստեղ կարելի է նաև ընթրել»,- գրում է Jamnews-ը։
Հայկական մայրաքաղաքի տեսարժան վայրերի շարքում հիշատակվում է նաև Հյուսիսային պողոտան, «որտեղ ձեզ սպասվում է նոր Երևանը. բարձրահարկ շենքեր, ժամանակակից ճարտարապետություն, արևմտյան ոճի սրճարաններ, բրենդային խանութներ, ինչպես նաև «Կասկադը», որտեղ ամառային ամիսներին բացօթյա համերգներ են կազմակերպվում, առավել հաճախ՝ ջազ բենդների»։
«Այստեղ է գտնվում Գաֆեսճյան արվեստի կենտրոնը, որտեղ ներկայացված են համաշխարհային արվեստի գլուխգործոցները։ Կենտրոնի շնորհիվ «Կասկադի» պուրակում ժամանակակից քանդակներ են տեղադրված. Ֆերնանդո Բոտերոյի «Հռոմեացի զինվորը», Լին Չեդվիկի «Նստած ֆորմաները», Բարի Ֆլանագանի «Նապաստակը զանգի վրա»»,- գրում է միջազգային պարբերականը։
Այն խորհուրդ է տալիս մի քանի արտահայտություն սովորել, որոնք կօգնեն դուրս գալ ցանկացած իրավիճակից։ «Իմացեք, որ տղամարդիկ միմյանց ողջունում են «բարև, ախպեր» խոսքերով` անկախ նրանից՝ ծանոթ են նրանք թե ոչ։ Եթե ձեզ դիմեն «ախպեր»-ով, չընկճվեք, դա պարզապես բարյացակամության դրսևորում է», — գրում է Jamnews-ը։
«Ցավդ տանեմ» արտահայտությունը կարող է տարօրինակ թվալ, սակայն այն կախարդական ուժ ունի և կարող է շտկել ցանկացած կոնֆլիկտային իրավիճակ, նշում է պարբերականը։
