«Ժողովուրդ». Երեք նախագահներն իրար կողքի չկանգնեցին
«Ժողովուրդ» թերթն, անդրադառնալով սեպտեմբերի 21-ի տոնական միջոցառումներին, իր ընթերցողների ուշադրությունն է հրավիրում այն հանգամանքի վրա, որ երեկ զորահանդեսի ժամանակ Հանրապետության հրապարակում այդպես էլ իրար կողքի չկանգնեցին ՀՀ 3 նախագահները:
«Ապրիլյան քառօրյա պատերազմից հետո Լևոն Տեր-Պետրոսյանի և Սերժ Սարգսյանի միջև առկա անջրպետը կարծես թե հաղթահարվել էր: Ուստի, եթե նա մասնակցեր զորահանդեսին՝ որպես առաջին գերագույն գլխավոր հրամանատար, միանգամայն տրամաբանական կլիներ: Սակայն դա տեղի չունեցավ: Իհարկե, հնարավոր է՝ առաջին նախագահը մտավախություն ուներ, որ եթե ինքը կանգնի Սերժ Սարգսյանի կողքին, ապա նրա ղեկավարած քաղաքական ուժը կարող էր «հաճախորդ» ընկալվել: Իսկ երկրորդ նախագահ Ռոբերտ Քոչարյանի դեպքում այս մտավախությունը չի կարող լինել, քանի որ հենց նա իր իշխանությունը փոխանցեց Սերժ Սարգսյանին, և նրանք արտաքուստ նորմալ հարաբերություններ ունեն միմյանց հետ, և բոյկոտը Քոչարյանի կողմից ամենաընդունված քայլը չէր՝ անկախ հիմնավորումներից: Այսպիսով, մեր երկրում դեռ կշարունակի մնալ կարծրատիպը, որ պետական տոների պաշտոնական արարողությունները գործող իշխանության մենաշնորհն են»:
«Առավոտ» Վարչապետի կախարդական փայտիկը, երկաթե նժույգներն ու դդումները
«Առավոտ»-ն անդրադարձել է վարչապետի կախարդական փայտիկի մասին հայտարարությանը: Թերթի աշխատակիցը Եռաբլուրում արձանագրել է պաշտոնյաների թանկարժեք ավտոմեքենաների շքերթը:
«Այս մեքենաներին նայելով հասկանում ենք, որ Կարեն Կարապետյանը ճիշտ էր: Իրոք, մեր տնտեսության վիճակը չափազանց ծանր է, և կախարդական փայտիկ էլ չկա, որ այս երկաթե նժույգները նորից դարձնեն դդում, իսկ մնացած գումարով բանակին զենք մատակարարեն ու տնտեսություն զարգացնեն»,- գրում է «Առավոտը»:
«Հայկական ժամանակ». Էկոնոմիկայի նախարարին կփոխեն
«Հայկական ժամանակ»-ն անդրադարձել է ձևավորվող նոր կառավարության թեմային: «Բացառված չէ, որ նոր ձևավորվող կառավարությունում Դաշնակցությունը, պահպանելով իր ունեցած քվոտան, կորցնի էկոնոմիկայի նախարարի պաշտոնը: Մեր տեղեկություններով` Արծվիկ Մինասյանը կարող է նշանակվել բնապահպանության նախարար: Ներկայում այդ հարցը քննարկվում է Դաշնակցություն կուսակցության վերնախավի և իշխանությունների միջև»:
ՀԺ-ն հիշեցնում է կառավարության նախորդ նիստում վարչապետ Կարեն Կարապետյանի ու Արծվիկ Մինասյանի միջև տեղի ունեցած թեթև վիճաբանությունը՝ հավելելով, որ դրանից հետո «կարծիքներ էին շրջանառվում, թե վարչապետը չի ցանկանում էկոնոմիկայի նախարարի պաշտոնում նրան տեսնել»:
«Մեր աղբյուրների փոխանցմամբ Կ. Կարապետյանը ցանկանում է տնտեսական ոլորտի նախարարություններում իր համար վստահելի մարդկանց նշանակել: Ներիշխանական պայմանավորվածությունների համաձայն` Դաշնակցությունը կառավարությունում ունենալու է երեք պորտֆել»,-գրում է թերթը:
«Հրապարակ». Երկրորդ ալիքը կքշի նաև մարզպետներին
«Հրապարակ» թերթն էլ կանխատեսում է, որ կառավարությունում կադրային փոփոխությունների երկրորդ ալիքն ավելի ուժգին է լինելու և հասնելու է նաև մարզեր, արդյունքում որոշ մարզպետներ հրաժեշտ են տալու իրենց պաշտոններին։
«Ինչպես հայտնի է, Կարեն Կարապետյանն ազդարարել է նոր ծրագրի մշակման գործընթացը, սակայն տեղեկություններ կան, որ նոր ծրագրում առանձնապես հեղափոխական մոտեցումներ տեղ չեն գտնելու, քանի որ դրանք հնարավոր չէ կարճ ժամանակում՝ մինչև խորհրդարանական ընտրություններն իրականություն դարձնել»,- գրում է «Հրապարակը»` հիշեցնելով, որ օրենքով սահմանված կարգով՝ կառավարության ձևավորումից հետո, 20-օրյա ժամկետում Կառավարությունը պետք է ԱԺ ներկայացնի իր գործունեության կառավարության ծրագիրը:
«Հայկական ժամանակ». ՊԵԿ-ը դարձյալ կկիսեն
«Հայկական ժամանակի» տեղեկություններով էլ սեպտեմբերի 26-ին ԱԺ-ն արտահերթ նիստ է հրավիրելու, որտեղ քննարկվելու է կառավարությունում կառուցվածքային փոփոխությունների անելու մասին նախագիծը: Ըստ թերթի օպտիմալացման առաջարկներում այսօր ամենաքննարկվող հարցը ՊԵԿ-ը դարձյալ հարկային ու մաքսային ծառայությունների բաժանելու մասին հարցն է:
«Խնդիրն այն է, որ Սերժ Սարգսյանը չի ցանկանում «կորցնել» ներկայիս ՊԵԿ նախագահ Հովհաննես Հովսեփյանին, իսկ Կարեն Կարապետյանը ցանկանում է իր կադրերին նշանակել այդ ոլորտում»,-գրում է թերթը:
«Հայոց աշխարհ». Հին բյուջեն չկատարած` նորի մասին են մտածում
«Հայոց աշխարհ»-ն էլ հիշեցնում է, որ առաջիկայում կառավարությունը պետք է ԱԺ քննարկմանը ներկայացնի 2017թ-ի բյուջեի նախագիծը, և դրա համար նոր ձևավորվող գործադիր իշխանությունը 10 օրից էլ պակաս ժամանակ ունի:
«Նոր կառավարությունը խիստ կաշկանդված է գործող պետական բյուջեի կատարման ընթացքով և ընդամենը 3-4 ամիս ժամանակ ունի վիճակը փոքր-ինչ շտկելու համար»,- գրում է թերթը՝ հավելելով, որ նախորդ կառավարությանը չհաջողվեց ապահովել բյուջետային եկամուտների հավաքագրումը, և բյուջեի թերակատարումը գերազանցում է 30 մլրդ դրամը:
«Արդեն այժմ բյուջեի պակասուրդն այն վիճակում է, որ կառավարությունը ստիպված է ավելի շատ մտածել այն կրճատելու, քան թե ավելացնելու մասին»,- գրում է «Հայոց աշխարհ»-ը:
