Միլս. ԱՄՆ նախագահը հավատարիմ է դեպքերի արդարացի ճանաչման հանձնառությանը

ԵՐԵՎԱՆ, 24 ապրիլի-Sputnik. Դեսպան Ռիչարդ Միլսի խոսքով` Միացյալ Նահանգների նախագահը շարունակում է հավատարիմ աշխատել այն ուղղությամբ, որպեսզի լիարժեք, արդարացի ու ամբողջական կերպով ճանաչվեն անցյալի դեպքերը։

«Երեկ ԱՄՆ նախագահ Բարաք Օբաման շատ ուժեղ հայտարարություն արեց։ Դեպքերը նա որակեց որպես 20-րդ դարի վատթարագույն վայրագություններից մեկը։ Միացյալ Նահանգների նախագահը հավատարիմ է մնում այն հանձնառությանը, ինչին ձգտում ենք մենք բոլորս` դեպքերի արդարացի և լիարժեք ճանաչումը»,-ասաց նա։

Դեսպանի խոսքով` լինելով հավերժական կրակի մոտ, հարգանքի տուրք մատուցելով` իրենք ևս մեկ անգամ վերահաստատում են իրենց այդ հանձնառությունը։

XIX դարի վերջի XX դարի սկզբին Օսմանյան կայսրությունում ավելի քան 1.5 մլն հայ սպանվեց։ Թուրքիան ավանդաբար մերժում է հայերի մեղադրանքները ցեղասպանության իրագործման հարցում և այս հարցի վերաբերյալ քննադատությունն արևմուտքի կողմից բավական ցավագին է ընդունում։

Առաջինը Օսմանյան կայսրությունում Հայոց ցեղասպանությունը 1965 թվականին ճանաչեց Ուրուգվայը, որի օրինակին հետևեցին Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։

ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։