ԵՐԵՎԱՆ, 22 ապրիլի — Sputnik. Սա Օբամայի վերջին ուղերձն էր ԱՄՆ-ի նախագահի պաշտոնը զբաղեցնելու ընթացքում:
«Այսօր մենք հիշատակում ենք 20-րդ դարի առաջին զանգվածային ջարդի` Հայոց Մեծ եղեռնի տարելիցը, որի ընթացքում մեկ ու կես միլիոն հայ տեղահանվել է, սպանվել և ուղարկվել մեռնելու Օսմանյան կայսրության վերջին օրերին», — ասել է Օբաման:
ԱՄՆ-ի նախագահը հարգել է բոլոր նրանց հիշատակը, ովքեր տուժել էին «այդ մութ օրերին» և կոչ է արել դաս քաղել այդ ողբերգությունից, որպեսզի նման բան ապագայում երբեք չկրկնվի:
Օբաման նաև հիշել է բոլոր նրանց, ովքեր օգնության են հասել հայերին այդ բարդ ժամանակներում: Նրանց թվում էր ԱՄՆ-ի դեսպան Հենրի Մորգենթաուն, որը անհանգստություն է հայտնել ինչպես ԱՄՆ-ի կառավարությանը, այնպես էլ Օսմանյան կայսրության առաջնորդներին` փորձելով կանգնեցնել բռնությունը:
«Մորգենթաուի նման ձայներն առաջվա պես նշանակություն ունեն գազանությունները կանխելու համար»,- հայտնել է ԱՄՆ-ի նախագահը` հավելելով, որ Մորգենթաուի ժառանգությունը ձևավորել է մարդու իրավունքների ոլորտում այնպիսի ակտիվիստների աշխարհայացքը, ինչպիսին Ռաֆայել Լեմկինն էր:
«Երբ անցյալից ապագային ենք նայում, առաջվա նման ընդգծում ենք պատմական հիշողության կարևորությունը` որպես կանխարգելման միջոցի և կոչ ենք անում փաստերի լիակատար, անկեղծ և արդար ճանաչման, որոնք կծառայեին բոլոր շահագրգիռ կողմերի շահերին: Ես հետևողականորեն ձևակերպել եմ իմ կարծիքն այն մասին, թե ինչ է տեղի ունեցել 1915-ին, և իմ տեսակետը չի փոխվել: Ես նաև տեսել եմ, որ ժողովուրդներն ու ազգերն ավելի ամուր են դառնում ու հիմք են դնում ավելի արդար և հանդուրժող ապագայի համար` ճանաչելով անցյալի ցավալի պահերը: Մենք առաջվա նման ողջունում ենք այն մարդկանց կարծիքները, որոնք ձգտել են լույս սփռել անցյալի մութ էջերին` սկսած թուրք և հայ պատմաբաններից մինչև Ֆրանցիսկոս պապ»,- ասել է ԱՄՆ-ի նախագահը:
Նա նշել է, որ «այսօր կանգնած ենք հայ ժողովրդի հետ ամբողջ աշխարհով մեկ, վերհիշում ենք Մեծ Եղեռնի սարսափները և հաստատում ենք մեր անփոփոխ հավատարմությունը ժողովրդավարական, խաղաղ և ծաղկուն Հայաստանին»։
