ԵՐԵՎԱՆ, 28 նոյեմբերի — Sputnik. Զարմացած զբոսաշրջիկներ, գոհ երևանցիներ, զգլխիչ բուրմունք և գինի: Երևանի Հյուսիսային պողոտայում այսօր բացվեց գինու առաջին տոնավաճառ-համտեսը, որտեղ բոլոր ցանկացողները կարող են ոչ միայն գնել, այլև համտեսել համեղ հայկական գինին:
Միջոցառման նպատակը հայրենական արտադրանքը ներկայացնելը, երկրի բնակիչների շրջանում գինի օգտագործելու մշակույթ ձևավորելն է: Միջոցառմանը մասնակցում է 23 ընկերություն, նրանցից յուրաքանչյուրը ներկայացնում է իր լավագույն արտադրանքը։
Հիասքանչ, որակյալ հայկական գինին վայելելու էին եկել ոչ միայն մայրաքաղաքի բնակիչներն ու հյուրերը, այլև պետական գերատեսչությունների, մասնավորապես քաղաքապետարանի և գյուղատնտեսության նախարարության ներկայացուցիչները:
«Ցուցահանդեսը կտևի երկու օր: Նոյեմբերի 28-29-ի տոնավաճառ-համտեսին ներկայացված է հայ գինեգործների արտադրանքի ողջ տեսականին։ Նրանց թվում են նաև տնային պայմաններում գինի պատրաստող անձինք», — ասաց Հայաստանի գյուղատնտեսության փոխնախարար Ռոբերտ Մակարյանը:
Նրա խոսքով` հայկական գինու արտահանման ծավալներն ավելացնելու բոլոր հնարավորությունները կան, հատկապես եթե հաշվի առնենք, որ տարբեր երկրների մասնագետները, գինեգործներն ու սոմելիեները բարձր են գնահատել և գնահատում տեղական ոգելից այս խմիչքը:
«Հայաստանի գյուղատնտեսության նախարարը փետրվարին կայցելի Հնդկաստան: Այդ երկրում միշտ մեծ է հետաքրքրությունը հայկական գինու և գյուղատնտեսական արտադրանքի նկատմամբ: Մեր պատվիրակության կազմում ընդգրկվել են նաև գինեգործներ, ովքեր հնդկական կողմին կներկայացնեն մեր արտադրանքը», — ասաց Մակարյանը:
Նա հայտնեց, որ հայկական գինին արտահանվում է հիմնականում Ռուսաստան, եվրոպական երկրներ և ԱՄՆ:
«Վերջին մեկ տարվա ընթացքում արտահանվել է 1.6 մլն լիտր գինի, մասնավորապես Ռուսաստան և եվրոպական երկրներ: Սակայն այժմ մենք պետք է նոր շուկաներ գտնենք, դիվերսիֆիկացնենք արտահանումը, որպեսզի կախում չունենանք մեկ-երկու շուկայից», — նշեց փոխնախարարը:
Նրա տվյալներով` Հայաստանում վերջին ինն ամիսների ընթացքում արտադրվել է 5 մլն լիտր գինի, և ցուցահանդես-համտեսը շատ կարևոր է գինու իրացման, սպառման և Հայաստանում գինու մշակույթի զարգացման համար: Սակայն նմանատիպ նախաձեռնությունները շատ կարևոր են նաև զբոսաշրջության զարգացման տեսանկյունից:
«Այս միջոցառումների հիմնական նպատակը հայրենական արտադրության ապրանքը ներկայացնելն է: Շատերը արտասահմանյան ապրանք են ընտրում, սակայն մեր նպատակն է խթանել տեղական արտադրանքի առաջխաղացմանը: Թեև մեր երկրում գինի քիչ են խմում, սակայն գինի օգտագործելու մշակույթը վերջին տարիներին վերածնվել է», — ավելացրեց փոխնախարարը:
Երևանի փոխքաղաքապետ Դավիթ Օհանյանն իր հերթին նշեց, որ նմանատիպ միջոցառումների անցկացման շնորհիվ հայ ֆերմերներն ու արտադրողները հնարավորություն են ստանում սպառել իրենց արտադրանքը և հասնել կոնկրետ նպատակի, այն է` գումար աշխատել:
Իրենք` արտադրողները, նշում են, որ բախվում են իրացման խնդրի հետ, որը պայմանավորված է Հայաստանի տնտեսական բարդ իրավիճակով: Տոնավաճառ-համտեսին ներկա էին նաև խոշոր ձեռնարկությունների ներկայացուցիչներ, ովքեր գինի են արտահանում Ռուսաստան:
«Մեր արտադրանքի 99%-ն արտահանվում է ռուսական շուկա, հիմա փորձում ենք արտահանել նաև Կանադա, ինչպես նաև գրավել եվրոպական շուկան: Հուսով ենք, որ շուտով Հայաստանի և Ռուսաստանի տնտեսական վիճակը կբարելավվի, և մենք կկարողանանք ավելի մեծ ծավալներով գինի արտահանել», — ասաց Լևոն Նուրազյանը:
Արտասովոր բույրով և յուրահատուկ համով տարբերվում է տնական գինին, որը դժվար է արտահանել, սակայն զբոսաշրջիկները սիրում են համտեսել տնական գինին, որի միջոցով բացահայտվում է երկրի ողջ կոլորիտը:
«Տնական գինին տարբերվում է գործարանայինից. երկրորդ դեպքում ըմպելիքը մանրակրկիտ մշակվում է: Երբեմն «քիմիա» է օգտագործվում, որպեսզի գինին երկար մնա ու չփչանա: Սակայն ամեն դեպքում մեր գինին լավն է ու մաքուր», — ասաց Արենի գյուղի բնակիչ Խաչիկ Պետրոսյանը, ով տնական գինի է պատրաստում:
Այս տարի նա արդեն 3 տոննա գինի է արտադրել:
«Մենք ինքներս ենք խաղողը հավաքում, իսկ հետո գինի պատրաստում: Նման միջոցառումները շատ կարևոր են: Մարդիկ շփվում են և իմանում են մեր գինու մասին», — ավելացրեց Պետրոսյանը:
Տոնավաճառ-համտեսը կազմակերպել են Երևանի քաղաքապետարանն ու գյուղատնտեսության նախարարությունը համագործակցության հուշագրի շրջանակում:
Պետական երկու գերատեսչությունների համագործակցությունը սկսվել է 2011 թվականին, երբ Երևանում սկսեցին գործել գյուղատնտեսական արտադրանքի տոնավաճառները: Առաջին փորձը բավականին հաջող էր, և նրանք որոշեցին շարունակել համագործակցությունը:
Գյուղատնտեսության նախարարի նախաձեռնությամբ որոշում էր կայացվել շարունակել այդ ավանդույթը` տեղական արտադրողների, վերամշակող արդյունաբերության արտադրանքը ներկայացնելով հասարակությանը տոնավաճառների, ցուցահանդեսների և համտեսների միջոցով:
