Հայաստանում մի շարք դեղեր անվավեր են ճանաչվել

ԵՐԵՎԱՆ, 9 սեպտեմբերի – Sputnik. Հայաստանում մի շարք դեղեր անվավեր են ճանաչվել։ Այս մասին նշված է ՀՀ առողջապահության նախարարության կայքում։

Ինչպես նշված է հաղորդագրության մեջ, դեղերն անվավեր են ճանաչվել մարքեթինգային նկատառումներից ելնելով։

ՀՀ առողջապահության նախարարության դեղորայքային քաղաքականության բաժնի պետ Անահիտ Մկրտչյանը Sputnik Արմենիային հայտնեց, որ դեղերն անվավեր են ճանաչել անմիջապես արտադրողները։

«Հայաստան մատակարարող ընկերությունների հաշվարկները ցույց են տվել, որ այդ դեղերը ժամանակի ընթացքում չեն արդարացրել սպասումները, այդ պատճառով հենց արտադրողներն այդ դեղերն անվավեր են ճանաչել»,– նշեց Մկրտչյանը։

Ըստ բաժնի պետի, նշված դեղերի առնչությամբ որակային խնդիր չի եղել, պարզապես շրջանառությունը քիչ է եղել, դեղերը պահանջարկ չեն ունեցել, այդ պատճառով դրանք անվավեր են ճանաչվել։

Ինչպես նշված է նախարարության կայքում հրապարակված ցանկում, Հայաստանի Հանրապետությունում անվավեր են ճանաչվել «Դորիպրեքս, դորիպենեմ (դորիպենեմի մոնոհիդրատ), դեղափոշի կաթիլաներարկման լուծույթի, 500 մգ, ապակե սրվակներ (10)» դեղի,  «Հիզաար Ֆորտե 100մգ/12,5մգ, լոզարտան (լոզարտան կալիում), հիդրոքլորոթիազիդ, դեղահատեր թաղանթապատ, 100մգ+12,5մգ, բլիստերում (28/2x14/)» և «Հիզաար Ֆորտե 100մգ/25մգ, լոզարտան (լոզարտան կալիում), հիդրոքլորոթիազիդ, դեղահատեր թաղանթապատ, 100մգ+25մգ, բլիստերում (28/2x14/)», «Կոզաար, լոզարտան (լոզարտան կալիում), դեղահատեր թաղանթապատ, 50մգ, բլիստերում (14)» և «Կոզաար, լոզարտան (լոզարտան կալիում), դեղահատեր թաղանթապատ, 100մգ, բլիստերում» դեղերի գրանցումը: