Հայաստանի Հանրապետության Տավուշի մարզի Կիրանց գյուղի շրջանում Հայաստանի և Ադրբեջանի միջև սահմանազատման և սահմանագծման արդյունքն արդեն տեսանելի է քարտեզի վրա։ Sputnik Արմենիայի թղթակիցը տևական ժամանակ հետևել է տվյալների թարմացմանը։
Հայաստանն ու Ադրբեջանը դեռ 2024 թվականին պայմանավորվել և սահմանազատում ու սահմանագծում էին իրականացրել Բաղանիսի և Բերքաբերի միջև ընկած մի քանի հատվածներում։
Դրանից հետո Հայաստանի պատկան մարմինները մեր բազմաթիվ հարցումներին ի պատասխան հրաժարվում էին տրամադրել սահմանային սյուների կոորդինատները՝ պատճառ բերելով «գաղտնիությունը»։ Ընդ որում՝ ողջ գործընթացը, այդ թվում՝ սյուների տեղադրումը, իրականացվել է Ադրբեջանի հետ համատեղ։
Ճշգրիտ կոորդինատների բացակայության պատճառով դժվար էր քարտեզի վրա նշմարել սահմանագծումից հետո գետնի վրա տեղի ունեցած իրական փոփոխությունները։
Այժմ արդեն թարմացված տվյալները հնարավորություն են տալիս ներկայացնել այն փոփոխությունները, որոնք տեղի են ունեցել մասնավորապես Կիրանց գյուղի շրջանում։
Փոփոխությունները, որոնք սահմանազատումից հետո տեղի են ունեցել Կիրանց գյուղի շրջանում
© Photo : Google maps
Google Earth-ի արբանյակային լուսանկարում դեղինով պատկերված է սահմանը՝ ըստ Google-ի։ Կարմիրով մենք նշել ենք այն սահմանը, որն անցկացվել է գետնի վրա սահմանազատման և սահմանագծման արդյունքում՝ հիմնվելով ԽՍՀՄ ԶՈւ Գլխավոր շտաբի 1976 թվականի քարտեզի վրա։
Շագանակագույնով նշել ենք մոտավոր տարածքը, որի նկատմամբ վերահսկողություն է ստացել Ադրբեջանը։
Սահմանազատված սահմանին տեղադրված է ցանկապատ և փշալար, իսկ Կիրանցի դպրոցի հարևանությամբ մի փոքր հատվածում պատ է կառուցված։
Գործընթացի արդյունքում հայկական զինված ուժերը հետ են քաշվել մի քանի դիրքերից։ Եվ եթե որոշ դիրքերի հետքաշումը տեղավորվում է սահմանազատման տրամաբանության մեջ, ապա անհասկանալի է, թե ինչու է Հայաստանը հանել Բերքաբերի ջրամբարի ափին գտնվող դիրքը, որը սահմանազատման գոտուց դուրս էր։
Այս մասին մենք նախկինում մանրամասն գրել էինք. արբանյակային լուսանկարներն ապացուցում են, որ այն այլևս չկա։