ԵՐԵՎԱՆ, 19 հուլիսի - Sputnik. Երևանի առաջին ատյանի ընդհանուր իրավասության դատարանը բավարարել է ՀՀ քննչական կոմիտեի Ստեփանակերտի քաղաքապետ Դավիթ Սարգսյանի խափանման միջոցը փոխելու միջնորդությունը. Ռուբեն Մելիքյան
Նշենք, որ ՔԿ–ն միջնորդություն է ներկայացրել դատարան՝ Դավիթ Սարգսյանի տնային կալանքը փոխել վարչական հսկողություն խափանման միջոցով, որը ենթադրում է խիստ սահմանափակումներ։
«Նրան արգելվել է երեկոյան 7-ից մինչև առավոտյան 7-ը լքել իր բնակարանը, արգելվել է որևէ շփում ունենալ գործով անցնող անձանց, ինչպես նաև Ստեփանակերտի քաղաքապետարանում աշխատած մարդկանց հետ, խոսքը 1700–ից ավելի մարդկանց մասին է։ Արգելվել է նաև զվարճանքի և սպասարկման օբյեկտներ հաճախել, դա նշանակում է, որ մարդը չի կարող անգամ խանութ գնալ»,– ասաց Ռուբեն Մելիքյանը։
Հիշեցնենք՝ հուլիսի 16-ին Վերաքննիչ դատարանը բավարարեց Ստեփանակերտի քաղաքապետին տնային կալանքի տակ պահելու որոշման դեմ ներկայացրած վերաքննիչ բողոքը, ու նա հայտնվեց ազատության մեջ։
Դատավորի մեկ այլ որոշմամբ վերաքննիչ դատարանը ոչ իրավաչափ էր ճանաչել նաև քաղաքապետի քսանօրյա կալանավորումը։
Դավիթ Սարգսյանը մայիսի 27-ին 20 օրով կալանավորվեց, նա մեղադրվում է խմբի կազմում առանձնապես խոշոր չափերով խարդախություն անելու, ինչպես նաև կեղծ փաստաթղթեր պատրաստելու և 3 անձի հետ դրանք օգտագործելու մեջ։ Հունիսի 13-ին նրա նկատմամբ 2 ամսով տնային կալանք կիրառվեց։