ԵՐԵՎԱՆ, 7 հոկտեմբերի – Sputnik. Ռուսաստանը չի կարող ուշադրություն չդարձնել Վլադիմիր Զելենսկու հայտարարություններին, հայտարարել է ՌԴ նախագահի մամուլի քարտուղար Դմիտրի Պեսկովը:
«Իհարկե, մենք չենք կարող կողքով անցնել և այլ պետությունների առաջնորդներին կոչ ենք անում նույնպես չանտեսել, որովհետև սիմպտոմատիկայի տեսանկյունից դրանք շատ վտանգավոր հայտարարություններ են, շատ վտանգավոր։ Այսինքն՝ Ուկրաինայի ղեկավարը աշխարհի առաջատար պետություններին, միջուկային ակումբի երկրներին փաստացի կոչ է անում կանխարգելիչ հարված հասցնել մեր երկրին` ՌԴ-ին», - «Ռոսիա 1» հեռուստաալիքի եթերում ասել Է Պեսկովը «Մոսկվա.Կրեմլ.Պուտին» հաղորդման ժամանակ։
Ավելի վաղ Զելենսկին, տեսակապով ելույթ ունենալով Ավստրալիայի Լոուի ինստիտուտում, հայտարարել էր, որ ՆԱՏՕ-ն պետք է կանխարգելիչ հարվածներ հասցնի ՌԴ-ին, ոչ թե սպասի Ռուսաստանի միջուկային հարվածներին: Ավելի ուշ Զելենսկու մամուլի քարտուղար Սերգեյ Նիկիֆորովը պարզաբանել էր, որ նա ՌԴ-ի դեմ միջուկային զենք կիրառելու կոչ չի արել, այլ կանխարգելիչ պատժամիջոցներն է նկատի ունեցել։
«Դա միանգամայն աղաղակող հայտարարություն է, որը խոսում է Ուկրաինայի նախագահի բարոյական վիճակի մասին, որը հղի է շատ վտանգավոր անդառնալի սխալներով, ինչը ևս մեկ անգամ ընդգծում է մեր նախագահի իրավացիությունը, երբ նա որոշում էր կայացնում հատուկ ռազմական գործողություն անցկացնելու մասին»,-ասել Է Պեսկովը:
Նա ընդգծել է, որ եղել են Զելենսկու տոնը դատապարտելու ինչ-որ երկչոտ փորձեր, բայց ոչ ավելին։
«Բայց, ցավոք, ոչ մեկի մտքով չանցավ սաստել իր վասալին։ Դա շատ վտանգավոր է»,-նշել է Պեսկովը։
Ավելի վաղ Պեսկովը ՌԻԱ Նովոստիին ասել էր, որ նման խոսքերը ոչ այլ ինչ են, քան համաշխարհային պատերազմ սկսելու կոչ, դրա պատասխանատվությունը պետք է կրեն ԱՄՆ-ն և Մեծ Բրիտանիան, որոնք փաստացի ղեկավարում են Կիևի գործողությունները: Նա նաև ընդգծել էր, որ Զելենսկու խոսքերին պետք է ուշադրություն դարձնեն աշխարհի բոլոր երկրները: Ուկրաինայի նախագահի հայտարարությունները դժգոհություն են հարուցել նաև ՄԱԿ-ում, որտեղ հիշեցրել էին, որ միջուկային հակամարտության վերաբերյալ բանավեճերն անգամ անընդունելի են։