ԵՐԵՎԱՆ, 5 մայիսի – Sputnik. Այս պահին լարված իրավիճակ է Երևանի Աթենքի փողոցում։ Մի խումբ քաղաքացիներ` «Հայաստան» խմբակցության պատգամավոր Արամ Վարդևանյանի գլխավորությամբ, քայլերթով շարժվում էին դեպի Ֆրանսիայի հրապարակ։ Սակայն մեծաթիվ ոստիկանական ուժեր մոտեցան նրանց և սկսեցին բիրտ ուժով բերման ենթարկել։
Ոստիկանները շրջապատել են Արամ Վարդևանյանին և չեն թողնում շարժվել։ Արամ Վարդևանյանը նշեց` երեք անգամ փորձեցին իրեն բերման ենթարկել, սակայն ավտոբուսի մոտից զղջացին։ «Ես դեմ եմ այդ վարքագծին, ուզում են` թող բերման ենթարկեն»,- ասաց նա։
Բերման ենթարկվածները բացել էին ոստիկանական ավտոբուսի պատուհանները և գոռում էին «Նիկո՛լ, դավաճա՛ն»։
Բողոքի ակցիայի մասնակիցները ծափահարություններով դեպի ոստիկանության բաժանմունք ճանապարհեցին իրենց ընկերներին և շարունակում են իրենց երթը։
ՀՀ երկրորդ նախագահի որդին` Լևոն Քոչարյանը, լրագրողների հետ զրույցում նշեց, որ խաղաղ երթ էին անում, երբ ոստիկանները բերման ենթարկեցին իրենց` շուրջ 20 ընկերների։ «Ոստիկաններին թվում է, որ նման գործողություններով կարող են կասեցնել երթը, սակայն օր օրի ավելի շատ մարդ է մասնակցում մեր ակցիաներին»,- ասաց նա։
Նշենք, որ այսօր առավոտից «Դիմադրություն» շարժման մասնակիցներն ու նրանց աջակիցներն անհնազանդության ակցիաներ են սկսել Երևանի տարբեր հատվածներում։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։ Ապրիլի 13-ին խորհրդարանում նա ափսոսանք հայտնեց, որ 2018-2019 թվականներին ժողովրդին չի ասել, որ «մեր բոլոր հեռու և մոտիկ բարեկամները մեզնից ակնկալում են, որ մենք այս կամ այն կոնֆիգուրացիայով Ադրբեջանին հանձնենք 7 հայտնի շրջանները և իջեցնենք Արցախի կարգավիճակի համար մեր սահմանած նշաձողը»։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Այս օրերին ոստիկանությունը պարբերաբար բերման է ենթարկում (երբեմն բիրտ ուժ կիրառելով) անհնազանդության ակցիաների առավել ակտիվ մասնակիցներին։