ԵՐԵՎԱՆ, 1 մարտի – Sputnik. Ռուսաստանը կտրականապես հերքում է Ուկրաինայի տարածքում ռազմական հանցագործությունների վերաբերյալ մեղադրանքները, որոնք ներկայացրել է Կիևը։ Տեղեկությունը լրագրողներին է հայտնել ՌԴ նախագահի մամուլի քարտուղար Դմիտրի Պեսկովը։
Լրագրողները խնդրել են մեկնաբանել Միջազգային քրեական դատարանի (ՄՔԴ) ներկայացուցիչների այն հայտարարությունները, թե իրենք Ռուսաստանի կողմից Ուկրաինայի տարածքում ռազմական հանցագործությունների կատարման ապացույցներ ունեն:
«Մենք կտրականապես հերքում ենք դա։ Եվ հետո Ռուսաստանը, այնուամենայնիվ, ՄՔԴ–ի մասնակից չէ», - ասել Է Պեսկովը։
Ավելի վաղ ՄՔԴ-ի դատախազ Քարիմ Խանը հայտարարել էր, որ ուշադիր հետևում Է Ուկրաինայի իրադրությանը, և նշել, որ ՄՔԴ-ն կարող է հետաքննել ցեղասպանության ցանկացած ակտ, մարդկության դեմ հանցագործություն կամ ռազմական հանցագործություն, որոնք կարող էին Ուկրաինայում տեղի ունենալ 2014 թվականից ի վեր:
Նշենք, որ ՄՔԴ-ն հաստատել է Ուկրաինայից Ռուսաստանի դեմ հայց ստանալու փաստը, որում Կիևը հերքում է Լուգանսկի և Դոնեցկի մարզերում ցեղասպանության ակտերը, որոնց մասին հայտարարում է ՌԴ-ն: Խանի խոսքով՝ Միջազգային քրեական դատարանը Ուկրաինայի իրադրության հետաքննությունը հնարավորինս արագ կսկսի։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Ավելի ուշ ՌԴ ՊՆ-ն ընդգծեց, որ Ռուսաստանի զինված ուժերը ոչ մի հրթիռային, ավիացիոն կամ հրետանային հարված չեն հասցնում Ուկրաինայի քաղաքներին. խոցման բարձր ճշգրտության միջոցներով շարքից դուրս են բերվում ռազմական ենթակառուցվածքները, ՀՕՊ օբյեկտները, ռազմական օդանավակայանները և ավիացիան: