Որքա՞ն է այն խցի տարածքը, որտեղ գտնվում են 3 կալանավորված սրբազանները
Բաժանորդագրվել
Ավելի վաղ ԶԼՄ–ները հայտնել էին, որ վերջերս ձերբակալված Արշակ սրբազանին երկու այլ արքեպիսկոպոսների հետ նույն խցում են տեղավորել:
ԵՐԵՎԱՆ, 16 դեկտեմբերի – Sputnik. Անազատության մեջ գտնվող երեք արքեպիսկոպոսների պահման պայմանները լիովին համապատասխանում են օրենսդրական նորմերին։ Այս մասին Հայաստանի քրեակատարողական ծառայությունը հայտնել է Sputnik Արմենիայի հարցմանն ի պատասխան` չնշելով սակայն` քանի քառակուսի մետր է խուցը։
Ավելի վաղ մամուլում տեղեկություններ էին տարածվել, որ դեկտեմբերի սկզբին կալանավորված Մայր աթոռի դիվանապետ Արշակ Խաչատրյանին նույն խցում են տեղավորել երկու այլ արքեպիսկոպոսների՝ Բագրատ Գալստանյանի և ՀԱԵ Շիրակի թեմի առաջնորդ Միքայել Աջապահյանի հետ: Այս առնչությամբ ՔԿՀԾ–ից հետաքրքրվեցինք, թե ընդհանուր առմամբ քանի՞ խուց կա հայաստանյան բանտերում, դրանցից քանի՞սն են զբաղված և որքա՞ն է կազմում այն խցի տարածքը, որտեղ պահվում են եկեղեցու բարձրաստիճան 3 հոգևորականները:
Ի պատասխան ՔԿՀԾ–ից հայտնել են, որ արքեպիսկոպոսների պահման պայմանները լիովին համապատասխանում են օրենսդրական նորմերին։ Ըստ օրենքի՝ ձերբակալված և կալանավորված անձանց հատկացված բնակելի տարածքի չափը չի կարող յուրաքանչյուր անձի համար 4 քմ–ից պակաս լինել: Ծառայությունից, սակայն, չեն պատասխանել առաջին երկու հարցերին՝ պատճառաբանելով, որ խցերի քանակի և հագեցվածության մասին տեղեկատվությունը հրապարակման ենթակա չէ:
Հիշեցնենք` տևական ժամանակ է` ՀՀ իշխանությունը արշավ է սկսել եկեղեցու ու հատկապես կաթողիկոսի դեմ։ Ճաղերի հետևում են «Սրբազան պայքար» շարժման առաջնորդ Բագրատ արքեպիսկոպոս Գալստանյանը, Շիրակի թեմի առաջնորդ Միքայել արքեպիսկոպոս Աջապահյանը, Արագածոտնի թեմի առաջնորդ Մկրտիչ սրբազանը, Մայր աթոռի դիվանապետ Արշակ արքեպիսկոպոս Խաչատրյանը։
Նոյեմբերի 27-ին հայտնի դարձավ, որ մի քանի եպիսկոպոսներ հայտարարություն են տարածել` դատապարտելով Մայր աթոռի դիվանապետ Արշակ արքեպիսկոպոս Խաչատրյանի վերաբերյալ կաթողիկոսի որոշումը, և պահանջում են վերականգնել Հայ առաքելական եկեղեցու սուրբ անունը։ Նույն օրը երեկոյան նրանց ընդունեց ՀՀ վարչապետ Նիկոլ Փաշինյանը։
