Վարորդական վկայականներն ու տեխանձնագրերը պետք է դարձնել էլեկտրոնային. Բիչախչյանի առաջարկը
Վարորդական իրավունքի վկայական
© Sputnik / Aram Nersesyan
Բաժանորդագրվել
Թվայնացման ուղով գնացող Հայաստանում տարիներ առաջ էր որոշվել վարորդական վկայականների ու ավտոմեքենաների տեխանձնագրերը կցել անձնագրային համակարգի բազային։ Անձնագրային և վիզաների վարչության նախկին պետը ներկայացնում է համակարգի կատարելագործմանն ուղղված իր առաջարկը։
ԵՐԵՎԱՆ, 13 մայիսի – Sputnik. Քանի որ ՀՀ–ն որդեգրել է թվայնացման գնալու քաղաքականություն, վարորդական իրավունքի վկայականներն ու ավտոմեքենաների տեխնիկական անձնագրերը պետք է դարձնել էլեկտրոնային։ Sputnik Արմենիայի հետ զրույցում այս տեսակետը հայտնեց Անձնագրային և վիզաների վարչության նախկին պետ, ոստիկանության գնդապետ Մնացական Բիչախչյանը։
ՀՀ կառավարությունը մայիսի 8-ին ընդունեց մի որոշում, ըստ որի` Հայաստանում տրանսպորտային միջոցների առուվաճառքը, նվիրատվությունը, լիզինգը, համարանիշների ստացումը, հաշվառման վկայականները կթվայնացվեն։
«Էլեկտրոնային տեխանձնագիրը կարող է լինել անժամկետ, իսկ վարորդական իրավունքի ժամկետը կարող է պայմանավորվել անձնագրի վավերականության ժամկետով։ Փաստաթղթերի ժամկետը, որպես կանոն, սահմանվում է 10 տարի, քանի որ այդ ընթացքում անձի դեմքը փոխվում է, և կարիք է լինում փոխելու նաև լուսանկարը` նույնականացում ապահովելու համար։ Բայց եթե անձը ՀՀ քաղաքացի է, նրա տվյալները կան անձնագրային համակարգի բազայում, իսկ պարեկային ծառայությանը այդ բազան հասանելի է։ Հետևաբար պարեկն անհրաժեշտության դեպքում կարող է ստուգել` արդյոք անձն ունի վարելու իրավունք, վավերական անձնագիր, և անձնագրի լուսանկարով իրականացնի անձի նույնականացումը»,– առաջարկում է Բիչախչյանը։
Նրա դիտարկմամբ` էլեկտրոնային փաստաթղթավորումը պետությանն ու քաղաքացուն կազատի նաև ավելորդ ծախսերից, հերթերից, ժամանակի կորստից, ճանապարհային ոստիկանության հաշվառման քննական ստորաբաժանումներն էլ կբեռնաթափվեն։
Մնացական Բիչախչյան
© Sputnik / Andranik Ghazaryan
Անձնագրային և վիզաների վարչության նախկին պետի խոսքով` գաղափարը նոր չէ, այն եղել է դեռ նույնականացման քարտերի համակարգի ներդրման ժամանակ, որոնց պետք է կցվեին նաև վարորդական վկայականի ու ավտոմեքենայի տեխանձնագրի տվյալները։ Հետևաբար Բիչախչյանը պատկան կառույցներին առաջարկում է թվայնացման չիրագործված գաղափարը ներդնել արդեն նոր նույնականացման քարտերի էլեկտրոնային պահուստներում։
«Եթե ես իմ տրանսպորտային միջոցով երթևեկում եմ ՀՀ տարածքում, կարող եմ ավելորդ ծախս չանել, չստանալ պլաստիկ քարտ։ Իսկ եթե պետք է իմ ավտոմեքենայով երկրից դուրս գամ, այդ ժամանակ նոր դիմեմ պլաստիկ վարորդական իրավունքի վկայական ու տեխանձնագիր ստանալու»,– պարզաբանում է ոստիկանության գնդապետը։
Նա ընդգծում է` եթե ոչ այսօր, ապա առաջիկայում, միևնույնն է, գալու է ժամանակը, երբ էլեկտրոնային փաստաթղթերն անխուսափելի են լինելու, հետևաբար գործընթացն օր առաջ սկսելը առաջին հերթին հենց պետությանն է անհրաժեշտ։
Բիչախչյանն իր առաջարկը կառավարությանն անձամբ ներկայացնելու անհրաժեշտություն չի տեսնում։ Նա բավարարվում է մամուլում և սոցիալական կայքերում դրա հրապարակմամբ` հույսով, որ այն կհետաքրքրի պատկան կառույցներին։
