Սադրիչ գործելակերպ. Փաշինյանը դատապարտել է Թուրքիայի և Ադրբեջանի դրոշների այրումը
10:03 24.04.2025 (Թարմացված է: 15:53 24.04.2025)
© Sputnik
Բաժանորդագրվել
Միևնույն ժամանակ Փաշինյանը նաև դատապարտել է Ադրբեջանի ԶՈւ–ի կողմից Սյունիքի Խոզնավար գյուղի բնակելի տան ուղղությամբ արձակված կրակոցները։
ԵՐԵՎԱՆ, 24 ապրիլի – Sputnik. ՀՀ վարչապետ Նիկոլ Փաշինյանը սադրիչ և հրահրող գործելակերպ է համարում Թուրքիայի և Ադրբեջանի դրոշներն այրելը։ Այս մասին ՀՀ վարչապետի մամուլի խոսնակ Նազելի Բաղդասարյանը գրել է սոցցանցի իր էջում։
Ինչպես հայտնել ենք, ապրիլի 23–ին` Հայոց ցեղասպանության 110–րդ տարելիցի նախօրեին, ՀՅԴ Հայաստանի երիտասարդական միությունը կազմակերպել էր ավանդական ջահերով երթ, որի մեկնարկից առաջ Երևանի Հանրապետության հրապարակում վառեցին Թուրքիայի ու Ադրբեջանի դրոշները։
«ՀՀ վարչապետ Փաշինյանը դատապարտում է այդ գործելակերպը` այն համարելով անպատասխանատու և անընդունելի։ Միջազգայնորեն ճանաչված պետության, առավել ևս հարևան պետությունների դրոշների այրումը պետության ղեկավարի կողմից չի կարող այլ վերաբերմունքի արժանանալ։ Դա սադրիչ և հրահրող գործելակերպ է»,– գրել է Բաղդասարյանը։
Միևնույն ժամանակ վարչապետ Փաշինյանը դատապարտել է Ադրբեջանի զինված ուժերի կողմից Սյունիքի մարզի Խոզնավար գյուղի բնակելի տան ուղղությամբ արձակված կրակոցները և Ադրբեջանի ԶՈւ–ի կողմից հրադադարի ռեժիմի խախտումները։ ՀՀ վարչապետն Ադրբեջանի իշխանություններին կոչ է արել քննության առնել այդ դեպքերը և հանդես գալ պարզաբանումներով։
