Իսրայելի հյուսիսային 14 բնակավայրերում տարհանում է հայտարարվել
10:27 22.10.2023 (Թարմացված է: 10:28 22.10.2023)
© AP Photo / Tsafrir Abayov
Բաժանորդագրվել
Տարհանման ծրագիրը հավանության է արժանացել Իսրայելի պաշտպանության նախարար Յոավ Գալանտի կողմից։
ԵՐԵՎԱՆ, 22 հոկտեմբերի - Sputnik. Իսրայելի իշխանությունները հայտարարել են երկրի հյուսիսում գտնվող 14 բնակավայրերի տարհանման մասին։ Տեղեկությունը հայտնում է ՌԻԱ Նովոստին` հղում անելով Իսրայելի պաշտպանության բանակի (ՑԱԽԱԼ) հայտարարությանը։
«Իսրայելի պաշտպանության նախարարության արտակարգ իրավիճակների ազգային վարչությունն ու Իսրայելի պաշտպանության բանակը հայտարարել են Իսրայելի հյուսիսում գտնվող ևս մի քանի բնակավայրերի համար պետության կողմից ֆինանսավորվող տարհանման ծրագրի ընդլայնման մասին... 14 բնակավայրերը, որոնք ներառվել են ծրագրում հետևյալն են` Սնիր, Դան, Բեյթ–Հիլել, Շեար–Յաշուվ, Հագոշրիմ, Լիման, Մացուվա, Հեյլոն, Գորեն, Հորնոտ–հա–Գալիլ, Էվեն Մենահեմ, Սասա, Ցիվոն և Ռամոտ Նավթալի», – ասվում է հաղորդագրության մեջ։
Նշվում է, որ այս բնակավայրերի տարհանման ծրագիրը հավանության է արժանացել Իսրայելի պաշտպանության նախարար Յոավ Գալանտի կողմից։
Հիշեցնենք` հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։ Պաղեստինյան ՀԱՄԱՍ շարժման ռազմական թևը հայտարարեց, որ Իսրայելի դեմ «Ալ Աքսայի ջրհեղեղ» գործողություն է անցկացնում: Իսրայելի պաշտպանության բանակն էլ (ՑԱԽԱԼ) հայտնեց Գազայի հատվածում ՀԱՄԱՍ-ի դեմ «Երկաթե թրեր» գործողության մեկնարկի մասին:
Պաղեստինի առողջապահության նախարարությունը վերջին տվյալներով՝ Գազայի հատվածում զոհերի թիվը հասել է 4385 մարդու, ավելի քան 13 հազարը վիրավորվել են։ Իսրայելում, տեղի իշխանությունների տվյալներով, ավելի քան 1300 մարդ է զոհվել։ Տարբեր տվյալներով` ՀԱՄԱՍ–ի գերության մեջ կարող է շուրջ 150 իսրայելցի լինել։ Ինքը` շարժումը հայտարարել է, որ Գազայի հատվածում մոտ 200-250 գերի կա։
Պաղեստինա-իսրայելական հակամարտությունը, որը կապված է կողմերի տարածքային շահերի հետ, տասնամյակներ շարունակ լարվածության և ռազմական բախումների աղբյուր է հանդիսանում տարածաշրջանում։ ՄԱԿ-ի որոշմամբ` ԽՍՀՄ-ի ակտիվ դերակատարմամբ 1947-ին որոշվեց ստեղծել երկու պետություն՝ Իսրայել և Պաղեստին, բայց ստեղծվեց միայն իսրայելական պետությունը: Իսրայելը, համաձայնություն հռչակելով երկու պետությունների սկզբունքի հետ, վերջնականապես չազատեց պաղեստինյան տարածքները։
