Բաքուն դեռ պատրաստ չէ պատասխանել Երևանի խաղաղության նախաձեռնություններին. Բայրամով
18:00 23.12.2022 (Թարմացված է: 18:01 23.12.2022)
![Ադրբեջանի արտգործնախարար Ջեյհուն Բայրամովը Ադրբեջանի արտգործնախարար Ջեյհուն Բայրամովը - Sputnik Արմենիա, 1920, 23.12.2022](https://cdn.am.sputniknews.ru/img/07e6/05/0d/41994329_0:0:3123:1757_1920x0_80_0_0_b6ab69e32c8da0042e692bdc6f7864ff.jpg)
Ադրբեջանի արտգործնախարար Ջեյհուն Բայրամովը . Արխիվային լուսանկար
© Пресс-служба МИД РФ
/ Բաժանորդագրվել
Ադրբեջանի արտգործնախարարը նշել է, որ դեռևս հնարավորություն չի ունեցել մանրամասն ուսումնասիրել Երևանի առաջարկները և քննարկել դրանք գործընկերների հետ։
ԵՐԵՎԱՆ, 23 դեկտեմբերի - Sputnik. Բաքուն դեռևս պատրաստ չէ ամբողջական պատասխան տալ խաղաղության պայմանագրի վերաբերյալ Երևանից փոխանցված առաջարկներին։ Այս մասին հայտարարել Է Ադրբեջանի արտգործնախարար Ջեյհուն Բայրամովը ռուս գործընկեր Սերգեյ Լավրովի հետ բանակցություններից հետո կայացած մամուլի ասուլիսի ժամանակ։
Դեկտեմբերի 22-ին ՀՀ վարչապետ Նիկոլ Փաշինյանը հայտարարել էր, որ Հայաստանը դեռ մի քանի ամիս առաջ Ադրբեջանին է փոխանցել սահմանազատման և սահմանային անվտանգության հանձնաժողովի հետագա աշխատանքների վերաբերյալ իր առաջարկները: Երևանը նաև առաջարկներ է ուղարկել տարածաշրջանային կոմունիկացիաների բացման վերաբերյալ։
«Երեկ ես հնարավորություն ունեցա նայել առաջարկները, բայց, անկեղծ ասեմ, աշխատանքային օրվա ընթացքում էրև, բնականաբար, փաստաթուղթը մանրամասն ուսումնասիրելու, գործընկերների հետ քննարկելու հնարավորություն չունեցա։ Ընդհանուր պատկերացում կա, թե ինչ է մեզ փոխանցվել։ Այդ պատճառով դրան միավանկ պատասխան տալը (բավարարում է մեզ, թե չի բավարարում), հավանաբար, ճիշտ չէ»,-ասել Է Ադրբեջանի ԱԳՆ ղեկավարը։
Հիշեցնենք, որ 2021 թվականին Ադրբեջանի նախագահ Իլհամ Ալիևը հայտարարել էր Հայաստանի հետ խաղաղության պայմանագիր ստորագրելու պատրաստակամության մասին։ 2022 թվականի մարտին Բաքուն Երևանին էր փոխանցել հարաբերությունների կարգավորման վերաբերյալ հինգ կետից բաղկացած իր առաջարկը: Հայկական կողմը շտկումներ է ավելացրել և ուղարկել է իր տարբերակը։ Այդ ժամանակից ի վեր կողմերի միջև տարբեր մակարդակներով բանակցությունների մի քանի փուլ է եղել։