Ադրբեջանն այս պահին երկերեսանի պահվածք է ցուցաբերում հակամարտության կարգավորման հարցում։ Sputnik Արմենիայի հետ զրույցում նման կարծիք հայտնեց Տարոն Հովհաննիսյանը։
Ադրբեջանի արտգործնախարար Ջեյհուն Բայրամովը Սերբիայի գործընկերոջ հետ համատեղ ճեպազրույցում հայտարարել է, որ պաշտոնական Բաքուն հանդես է եկել մի շարք առաջարկներով` կապված Հայաստանի հետ բաց սահմանի հարցի լուծման հետ: Բացի այդ, Բայրամովը խոսել է նաև Հայաստանի հետ խաղաղության պայմանագիր կնքելու Բաքվի պատրաստակամության մասին: Նա ավելացրել է` ցավոք, մենք այդ առաջարկների վերաբերյալ արձագանք դեռ չենք ստացել Հայաստանից։
«Մի կողմից ուզում է միջազգային հանրության աչքին խաղաղասեր երևալ` հայտարարելով, որ ձգտում է վերջ տալ հակամարտությանը, համապարփակ պայմանագիր կնքել, խաղաղություն հաստատել տարածաշրջանում, բայց մյուս կողմից իր ցանկացած նմանատիպ հայտարարություն ըստ էության զուգորդում է առաջ քաշվող պահանջներով, որոնք տրամաբանության առումով չեն կարող ընդունելի լինել ո՛չ Հայաստանի, ո՛չ Արցախի, ո՛չ էլ հիմնախնդրով մտահոգված միջազգային խաղացողների` Մինսկի խմբի համանախագահների համար»,– ասաց վերլուծաբանը։
Ըստ Հովհաննիսյանի` ադրբեջանցիները փորձում են պարտադրել դելիմիտացիայի ու դեմարկացիայի իրենց պայմանները և պայմանագիր ասելով` հասկանում են ամբողջությամբ ու միակողմանիորեն Ադրբեջանին շահավետ պայմաններով փաստաթղթի ստորագրում, ըստ որի` Հայաստանն ամբողջությամբ պետք է հրաժարվի Արցախից, նրա կարգավիճակը բարձրաձայնելու փորձերից և այն ճանաչի որպես Ադրբեջանի մաս, որտեղ որոշումներ կայացնելու իրավասություն ունի միայն Բաքուն։
«Բայց նման բան, բնականաբար, չի կարող լինել` հաշվի առնելով Ադրբեջանի կողմից Արցախի դեմ ուղղված ագրեսիան, պատերազմի ընթացքում արցախցիների նկատմամբ իրականացված ռազմական հանցագործությունները, ինչը ևս մեկ անգամ փաստեց, որ Արցախի հայ բնակչությունը որևէ կերպ չի կարող լինել Ադրբեջանի կազմում և դա տեղաբնակների համար գոյաբանական ու անվտանգային խնդիր է»,– ասաց վերլուծաբանը։
Մայիսից ի վեր ադրբեջանցիները մտել են ՀՀ սուվերեն տարածք, Հովհաննիսյանի խոսքով` օկուպացրել շուրջ 80 կմ/ք տարածք Գեղարքունիքի ու Սյունիքի մարզերում, փորձում են կեղծ քարտեզներով առաջ տանել իրենց տեսակետը, թե իբր այդ տարածքները նույնպես ադրբեջանական են։ Ըստ նրա` Հայաստանում որևէ իշխանություն չի կարող հանդուրժել նման իրավիճակը, և Ադրբեջանի վարքագիծն ըստ էության միջազգայնորեն ընդունված կանոնակարգերի կոպիտ խախտում է, բացի դրանից ՀՀ Սահմանադրությամբ ամրագրված է այն նորմը, որ Հայաստանի սուվերեն տարածքները չեն կարող կամայականորեն զիջվել, նույնը վերաբերում է նաև այսպես կոչված «Զանգեզուրի միջանցքին»։
Վերլուծաբանի գնահատմամբ` Ադրբեջանը բոլոր ճակատներում ձգտում է հասնել միակողմանի լուծումների, ուստի սա ոչ թե խաղաղության առաջարկ է, այլ բացառապես պաշտոնական Բաքվի շահերը սպասարկող և Հայաստանի ու Արցախի շահերը ոտնահարող առաջարկ, որն էլ միտված է լարվածության խորացմանը կամ նոր պատերազմ հրահրելուն։
