ԵՐԵՎԱՆ, 20 մայիսի – Sputnik. Այսօր` մայիսի 20-ին, ժամը 18:00-ին Ազգային ժողովի արտահերթ նիստ կգումարվի։ «Լուսավոր Հայաստան» խմբակցության այս նախաձեռնությունը հաստատել է ՀՀ ԱԺ խորհուրդը։
Նշենք, որ նախաձեռնությանը միացել էր նաև ԱԺ «Բարգավաճ Հայաստան» խմբակցությունը` ապահովելով արտահերթ նիստ գումարելու առաջարկի համար անհրաժեշտ ստորագրությունների քանակը։
Նիստի ավարտին նախատեսվում է ընդունել հայտարարություն` 2020թ–ի մայիսի 12-ից ՀՀ տարածքային ամբողջականության խախտման, ՀՀ–ի նկատմամբ ուժի կիրառման հետևանքով առաջացած իրավիճակում ՀՀ կառավարության կողմից իրականացվող գործողությունների մասին։
Հնարավոր է` նիստին մասնակցի նաև ՀՀ վարչապետի պաշտոնակատար Նիկոլ Փաշինյանը։
Հիշեցնենք` Վատիկանում ՀՀ նախկին դեսպան Միքայել Մինասյանը մայիսի 19–ին Facebook–ում գրել էր, որ ավարտվել է Հայաստանի և Ադրբեջանի միջև կնքվելիք նոր հայտարարության փաստաթղթի ձևակերպման աշխատանքը։
«Ահա փաստաթուղթը, որի մասին գրել էի». Միքայել Մինասյանը լուսանկար է հրապարակել
Նրա խոսքով` այդ փաստաթղթում դիվանագիտորեն, գեղեցիկ ձևակերպումներով, ըստ էության, ձևակերպվում է նոր դեմարկացիան՝ Հայաստանի համար աղետալի հետևանքներով։
Ըստ Մինասյանի` դեմարկացիան հիմնված է լինելու երեք սկզբունքի հիման վրա՝ ԽՍՀՄ քարտեզների, աշխարհագրական նպատակահարմարության և այդ պահին եղած իրական պատկերի։ Սրա հետևանքով, ըստ նրա, Նիկոլ Փաշինյանը քննարկման առարկա է դարձրել Տավուշի մարզի 5 գյուղերը և Արարատի մարզի մեկ գյուղն Ադրբեջանին հանձնելը։
Իսկ այսօր կառավարության նիստում ՀՀ վարչապետի պաշտոնակատար Նիկոլ Փաշինյանը հայտարարեց, որ պատրաստվում է ստորագրել այդ փաստաթուղթը։
ԱԺ «Լուսավոր Հայաստան» խմբակցության ղեկավար Էդմոն Մարուքյանն էլ այսօր հայտնեց, որ խմբակցությունը հանդես է եկել ԱԺ արտահերթ նիստ հրավիրելու նախաձեռնությամբ։
Ըստ Մարուքյանի` հայտարարությունը մոտավորապես նման տեսք է ունենալու` Սահմանադրության և միջազգային պայմանագրերի մասին օրենքի համաձայն` քաղաքական, ռազմական, ինչպես նաև մարդու իրավունքներին առնչվող որևէ փաստաթուղթ ստորագրվելու պարագայում այն պետք է վավերացվի խորհրդարանում։
