ԵՐԵՎԱՆ, 12 մայիսի - Sputnik. Մարտական գործողություններին մասնակցած ու զորացրված 18-30 տարեկան ավելի քան 1000 երիտասարդներ աշխատելու հնարավորություն կստանան «Նոր Էջ» սոցիալական պատասխանատվության նախագծի շրջանակներում։ Այն նախաձեռնել և մշակել է Հայաստանի մարդկային ռեսուրսների ասոցիացիան։
«Հարցազրույցների հիման վրա կազմակերպվում են մասնագիտական կողմնորոշման ծրագրեր, ուսուցման և զարգացման դասընթացներ, ինչի արդյունքում երիտասարդները հնարավորություն են ստանում վերականգնել իրենց մրցունակությունն աշխատաշուկայում, ինչպես նաև ունենալ ժամանակի և աշխատաշուկայի պահանջներին համահունչ հմտություններ ու գիտելիքներ։ Շուրջ 500 կազմակերպությունների և կառույցների պահանջներից ելնելով՝ ձևավորվում և իրականացվում են ուսուցման, զարգացման և ուղղորդման թիրախային ծրագրերը»,– մամուլի ասուլիսի ժամանակ ասաց ասոցիացիայի նախագահ Արփի Կարապետյանը:
Ողջ, բայց անտուն․ ինչպես են սոցիալական խնդիրները «սպանում» արցախյան պատերազմի մասնակցին
Ապրիլի 1-ի տվյալներով՝ 1303 գրանցված և 864 հարցմանը մասնակցած զորացրված երիտասարդների 52.8%-ը 21-24 տարեկան են, ընդ որում նրանց մեծամասնությունը բնակվում է Երևանում, Կոտայքի, Շիրակի և Արարատի մարզերում:
Միջին ներկայացվածություն կա Արմավիրի, Լոռու, Տավուշի, Գեղարքունիքի և Արագածոտնի մարզերից, առավել քիչ՝ Սյունիքից, Վայոց Ձորից և Արցախից:
«Հարցաթերթը լրացրած զինծառայողների շուրջ կեսը՝ 405 երիտասարդ, վնասվածք կամ խեղում ստացած զինծառայողներն են, որոնցից 321-ը ստացել են վնասվածք, 142-ը՝ խեղում, իսկ 47-ը ձեռք են բերել այլ հիվանդություններ: 149 զինծառայողներ անցել են բժշկասոցիալական փորձաքննություն և դեռ սպասում են արդյունքներին: Զորացրված երիտասարդներից 48-ը չեն ստացել հաշմանդամության կարգ, քանի որ համապատասխան հանձնաժողովի կողմից նրանց դիմումը մերժվել է»,–ասաց նախագծ մասնակից, «Արինսայթս» (R-Insights) հետազոտական ընկերության տնօրեն Լիլիթ Ղաբանյանը։
Նրա խոսքով`հարցմանը մասնակցած ընկերությունները ներկայացնում են գրեթե բոլոր ոլորտները, ներառյալ՝ տեղեկատվական տեխնոլոգիաների, կապի և հեռահաղորդակցության, ֆինանսաբանկային, առողջապահության, խորհրդատվության և աուդիտի, առևտրի, զբոսաշրջության և հյուրընկալության, կրթության և վերապատրաստումների, մշակույթի և սպորտի, տրանսպորտի և լոգիստիկայի, ինչպես նաև արտադրության, հասարակական գործունեության, շինարարության, գյուղատնտեսության և այլն:
Ծրագրին միացած գործատուներն առաջիկա 6 ամիսների համար տրամադրել են 884 աշխատատեղի հնարավորություն հետևյալ ուղղություններով՝ ծրագրավորում, ֆինանսներ, բժշկություն և դեղագործություն, գյուղատնտեսություն, ճարտարագիտություն, մարքեթինգ և դիզայն, հաճախորդների սպասարկում և վաճառք, արհեստագործություն և այլն։
Գործատուները պատրաստ են հաշմանդամություն ունեցող անձանց դիտարկել թափուր աշխատատեղերի մոտ կեսի՝ 429-ի համար:
Ծրագիրը հնարավորություն կտա տղաներին կարճ ժամանակահատվածում նոր մասնագիտություն ձեռք բերել` հաճախելով կազմակերպված դասընթացներին։
Նախագահականում մեկնարկել է «Զարթոնք» ծրագիրը վիրավորում ստացած զինծառայողների համար
«Այս պահին ունենք շուրջ 20 ակտիվ դասընթաց, որոնց շրջանակներում 66 երիտասարդ արդեն սկսել է հաճախել, իսկ 380-ը հերթագրվել է և սպասում է դասընթացների մեկնարկին: Բացի այդ, մասնակիցների ուշադրությանն է ներկայացվել 80 աշխատատեղ, որի համար դիմել են շուրջ 230 երիտասարդ, որոնք գործատուի կողմից դիտարկման փուլում են: Վերը ներկայացված ցանկը շարունակելի է: Դասընթացներն իրականացվում են՝ ելնելով գործատուների կարիքներից և համապատասխանեցվում են մասնակիցների պահանջարկին»,–ասաց Արփի Կարապետյանը:
Նշենք, որ նախագիծը մեկնարկել է 2021 թվականի հունվարին։ Ապրիլի 1-ից սկսվել է 2-րդ փուլը: Մայիսի 12-ի դրությամբ ծրագրին միացել են՝
- 1390 մասնակից (մարտական գործողություններին մասնակցած և զորացրված երիտասարդ)
- 220 գործատու
- 180 թրեյներ/մենթոր/վարպետ
