ԵՐԵՎԱՆ, 5 մայիսի – Sputnik. Երեկ երեկոյան ՀՀ զորամասերից մեկում զինծառայողի մահվան դեպքով քրեական գործ է հարուցվել։ Տեղեկությունը հայտնում է ՀՀ քննչական կոմիտեն։
Պաշտպանության նախարարությունն այսօր հայտնել էր, որ մայիսի 4-ին` ժամը 20.00-ի սահմանում, հարավային ուղղությամբ տեղակայված զորամասերից մեկի մարտական դիրքում հերթափոխի ընթացքում ծառայակցի կողմից զենքի օգտագործման կանոնների խախտման հետևանքով արձակված կրակոցից մահացու հրազենային վիրավորում է ստացել ժամկետային զինծառայող, շարքային Արտյոմ Հովիկի Մելքոնյանը։
ՔԿ–ն մանրամասնում է, որ զինծառայողը գլխի շրջանում է վիրավորում ստացել։
«Դեպքի առթիվ ՀՀ քննչական կոմիտեի զինվորական քննչական գլխավոր վարչության իններորդ կայազորային քննչական բաժնում ՀՀ քրեական օրենսգրքի 373-րդ հոդվածի 3-րդ մասով (զենքի, ռազմամթերքի և շրջապատի համար առավել վտանգ ներկայացնող առարկաների, նյութերի հետ վարվելու կանոնները խախտելը) հարուցվել է քրեական գործ։ Կատարվում է նախաքննություն»,–նշված է քննչական կոմիտեի հաղորդագրության մեջ։
Անհրաժեշտ քննչական և դատավարական այլ գործողություններ են ձեռնարկվում դեպքի բազմակողմանի, լրիվ և օբյեկտիվ հետազոտումն ապահովելու համար:
Ծանր վիրավորված ժամկետային զինծառայողը կտեղափոխվի Գերմանիա՝ բուժումը շարունակելու համար
