ԵՐԵՎԱՆ, 10 մայիսի – Sputnik. Դատական համակարգի որոշումներից այսօր նեղվում է իշխանությունը։ Նման հայտարարություն այսօր ԱԺ–ում արեց «Իմ քայլը» խմբակցության կողմից երկրորդ անգամ վարչապետի թեկնածու առաջադրված ՀՀ վարչապետի պաշտոնակատար Նիկոլ Փաշինյանը` իր ելույթում ներկայացնելով դատաիրավական համակարգի փոփոխությունները։
«Երրորդ հանրապետության գոյության ողջ ընթացքում դատական համակարգը նեղել է ընդդիմությանը։ Այսօր դատական համակարգի որոշումներից նեղվում է իշխանությունը»,– ասաց Փաշինյանը։
Ըստ նրա` եթե իշխանությունը երջանիկ լիներ դատական համակարգի որոշումներից, դա կնշանակեր, որ բարեփոխումներ չեն կատարվել ու հեղափոխությունը նպատակին չի հասել։
«Դատարաններն այսօր այլևս քննչական մարմինների կցորդը չեն,– ասաց Փաշինյանը,– մենք այսօր արդարադատության ոլորտում հասել ենք ամենակարևոր փոփոխությանը, որ վստահ կարող ենք ասել, որ այսօր ՀՀ ՔԿՀ–ներում անմեղ մարդ չկա»։
Հիշեցնենք` խորհրդարանն արձակելու ու արտահերթ խորհրդարանական ընտրություններ անցկացնելու նպատակով ԱԺ «Իմ քայլը» խմբակցությունն այսօր` մայիսի 10–ին, ԱԺ հատուկ նիստում դարձյալ առաջադրեց վարչապետի պաշտնակատար Նիկոլ Փաշինյանի թեկնածությունը։
Մարտի 18-ին վարչապետ Նիկոլ Փաշինյանը հայտարարել էր, որ հունիսի 20-ին Հայաստանում ԱԺ արտահերթ ընտրություններ կկայանան: Ավելի ուշ Ազգային ժողովը հաստատել էր Ընտրական օրենսգրքի փոփոխությունների նախագիծը, ըստ որի՝ խորհրդարանական ընտրությունները տեղի կունենան միայն համամասնական ընտրակարգով։
Ապրիլի 25-ին Նիկոլ Փաշինյանը հայտարարեց հրաժարական տալու մասին։
Նշենք, որ ՀՀ Սահմանադրության համաձայն` արտահերթ ընտրություններ ՀՀ–ում հնարավոր է անցկացնել միայն այդ դեպքում, երբ վարչապետի հրաժարականից հետո խորհրդարանը 2 անգամ անընդմեջ վարչապետ չի ընտրում։
ՀՀ Սահմանադրության 149 հոդվածի համաձայն` վարչապետ չընտրվելու դեպքում քվեարկությունից յոթ օր հետո անցկացվում է վարչապետի նոր ընտրություն, իսկ երկրորդ անգամ չընտրվելու դեպքում Ազգային ժողովն արձակվում է իրավունքի ուժով, ու նշանակվում են ԱԺ արտահերթ ընտրություններ։
Չենք գնդակահարի. Շարմազանովը խոսել է Վանեցյանի հետ դաշինքի և երկրում տիրող իրավիճակի մասին
